له اداري فساد د مبارزې برخې یو څارنوال د رشوت اخیستلو په تور ونیول شو
د کنټرول او مراقبت څارنوالۍ د اداري فساد له جرمونو سره د مبارزې څارنوالۍ ریاست د تحقیق څارنوال د ۳۰۰ امریکايي ډالرو د رشوت اخیستلو په تور د ۱۴۰۰ لمریز کال د زمري پر څلورمه ونیوه.
دا کس لویې څارنوالۍ ته د یوه هېوادوال تر شکایت وروسته نیول شوی او تر توقیق لاندې دی.
د افغانستان اسلامي جمهوري دولت لویه څارنوالي له اداري فساد سره پر جدي مبارزې ټینګار کوي او په ټولو کچو کې یې په دې برخه کې جدي او پرېکنده اجراات کړي دي.
له اداري فساد سره مبارزه او کورني اصلاحات د دغې ادارې د مشرتابه کاري لومړیتوب ګڼل کېږي او د شکایتونو د اخیستلو او له اداري فساد سره د مبارزې لپاره یې ۱۸۰ ځانګړې وړیا شمېره د هېوادوالو په واک کې ورکړې ده.
