له هېواده بهر ته د یو میلیون او ۴۰۰ زره امریکايي ډالرو د ناقانونه لېږد په تور یو کس محاکمه شو
محمد سلیم د خدایبردي زوی اوزبیکستان ته د پیسو د ناقانونه لېږد په تور د اداري فساد د لویو جرمونو پر ضد د مبارزې عدلي او قضايي مرکز ابتداییه محکمې له خوا د ۱۴۰۰ لمریز کال د چنګاښ پر ۲۱ محاکمه شو.
د موظف څارنوال د موندنو پر اساس، دوه تنه چې تر دې مخکې د یادو شویو پيسو د ناقانونه لېږد په تور ابتداییه محکمې محکوم کړي و، محمد سلیم یې د جرم شریک بللی و. د تحقیقاتو او اسنادو له راټولولو وروسته محمد سلیم له حیرتان بندره د یو میلیون او ۴۰۰ ډالرو په ناقانونه لېږد کې د جرم شریک پېژندل شوی او دوسیه يې د داري فساد د لویو جرمونو پر ضد د مبارزې عدلي او قضايي مرکز ته د رسیدګۍ په موخه لېږل شوې ده.
څارنوال، تورن ته له قضايي پلاوي څخه د تورن او مدافع وکیل په حضور د جزا کوډ د ۵۰۵ او ۵۸ مادو له مخې د سزا غوښتنه کړې ده.
د اداري فساد د لویو جرمونو پر ضد د مبارزې عدلي او قضايي مرکز ابتداییه محکمې محمد سلیم اوزبیکستان ته د یو میلیون او ۴۰۰ امریکايي ډالرو د ناقانونه لېږد په تور د قانون د حکم له مخې پر پنځو میاشتو تنفیذي حبس محکوم کړ.
