له وظیفوي واک څخه د ناوړه ګټه اخیستنې په تور دوه کسان په مجازاتو محکوم شول
له وظیفوي واک څخه د ناوړه ګټه اخیستنې په تور دوه کسان په مجازاتو محکوم شول
د انتقالاتو د لوا کنډک قوماندان محمد نذیر د محمد اکبر زوی او د مهران شرکت رئیس محب الله د میرزا جان زوی له لویو جرمونو سره د مبارزې عدلي او قضايي مرکز ابتداییه محکمې له خوا د ۱۳۹۹ لمریز کال د لیندۍ پر ۹ په علني ډول محاکمه شول.
د مؤظف څارنوال د صورت دعوا پر اساس، محمد نذیر له وظیفوي واک څخه د ناوړه ګټه اخیستې او اوپراسیون د پلان پر خلاف، ۲۶۰ موټرې د هرات له شوراب ولسوالۍ څخه هلمند ته انتقال کړې دي، په داسې حال کې چې اړوندو آمرانو ورته د ۱۵۰ موټرو د انتقال ویلي وو.
د قضيې مؤظف څارنوال د صورت دعوا له ترتیب او د اسنادو له راټولو وروسته له قضايي پلاوي څخه تورن کسانو ته له وظیفوي واک څخه د ناوړه ګټه اخیستنې په تور د جزا کوډ ۴۵۳ او ۴۰۳ مادو او د جزايي اجرااتو قانون د ۲۰۹ مادې پر اساس د مجازاتو غوښتنه وکړه.
د دغې جلسې قضايي پلاوي محمد نذیر له وظیفوي واک څخه د ناوړه ګټې اخیستنې په تور، د جزا کوډ د ۲۸۵ مادې د دویمې فقرې، د ۲۱۵ مادې دویمې فقرې څلورم بند او د جزا کوډ د ۱۷ مادې له مخې په شپږ میاشتو تنفیذي حبس په مجازاتو محکوم کړ.
د دغې ناستې د قضايي پلاوي د پرېکړې پر اساس، محب الله له وظیفوي واک څخه د ناوړه ګټې اخیستنې د شراکت په تور، د جزا کوډ د ۲۸۵ مادې دویمې فقرې، د همدغه کوډ د ۵۷ او ۱۷ مادې او د ۱۴ مادې د دویمې فقرې او همداراز د جزايي اجرااتو قانون د ۲۳۷ مادې پر اساس په یو کال او دوه میاشتې تنفیذي حبس او د ۲۱۷ زره او ۸۰۰ امریکايي ډالرو د سپارنې په نقدي جزا په مجازاتو محکوم شو.
