له ښځو سره د تاوتریخوالي پر ضد د عامه پوهاوي پروګرام په معارف وزارت کې ترسره شو

له ښځو سره د تاوتریخوالي پر ضد د عامه پوهاوي یو ورځنی پروګرام د معارف وزارت کارکوونکو ته ترسره شو.

دا پروګرام د ۱۳۹۶ کال د کب پر څوارلسمه له ښځو سره د تاوتریخوالي د مخنيوي، د ماشومانو سرغړونو او د بشري حقونو د ملاتړ مرستیالۍ او د نړیوالو حقوقو پرمختیایي سازمان IDLO)) په ملاتړ د دغه وزارت د بېلابیلو برخو کارکوونکو ته جوړ شوی و. له ښځو سره د تاوتریخوالي د مخنیوي، د ماشومانو د سرغړونو او د بشري حقونو د ملاتړ مرستیالۍ له ښځو سره د تاوتریخوالي د کمولو آمرې عاطفې حرمت په یاده غونډه کې وویل، چې له ښځو سره د تاوتریخوالي تر ټولو عمده لامل د خلکو له قانونه په تېره بیا له ښځو سره د تاوتریخوالي پر ضد له قانون څخه ناخبري ده. اغلې حرمت زیاته کړه:«موږ هڅه کوو، چې د عامه پوهاوي پروګرامونه په مرکز او ولایتونو کې ټولو دولتي او نادولتي ادارو ته وغځوو.»

له ښځو سره د تاوتریخوالي پر ضد، د ماشومانو سرغړونې او د بشري حقونو د ملاتړ مرستیالي هڅه کوي، چې د زده کړو او عامه پوهاوي او همدارانګه دې ته ورته نور پروګرامونو پيل او د ښځو د حقوقي پوهاوي کچه لوړه کړي، چې له ښځو سره د تاوتریخوالي کچه کمه شي. د یادونې وړ ده، چې دا ډول پروګرامونه به ولایتونو ته هم وغځېږي.