له کابل څرخي پله زندانه ۳۶۳ بندیان ازاد شول
له کابل څرخي پله زندانه د ۲۳ مېرمنو په ګډون ۳۶۳ بندیان د جمهور رئيس د اتمې ګڼې فرمان له مخې چې د کوچني اختر په مناسب صادر شوی، د ۱۳۹۷ کال د غبرګولي پر ۲۵ له بنده ازاد شول.
د دوی د ازداېدو پر مهال پر احکامو د تنفیذ او د حبس بدیل څارنوالۍ او د بخښنې او بند کمونې د فرمانونو د کمېسیون رئيس څارنیال محمد اسعد ساپي، د څرخي پله زندان عمومي رئيس محمد تواب احمدزي او د بخښنې او بند مودې د کمونې فرمانونو د کمېسیون غړو حضور درلود.
پر احکامو د تنفیذ او د حبس بدیل څارنوالۍ او د بخښنې او بند کمونې د فرمانونو د کمېسیون رئيس څارنیال محمد اسعد ساپي خوشې کېدونکو بندیانو ته د لوی څارنوال پيغام واوراوه.
په دغه پيغام کې لوی څارنوال څارنپوه محمد فرید حمیدي بندیانو ته د ازاد ژوندانه مبارکي ورکړې وه او زیاته کړې يې وه، چې دوی هڅه کوي، په کم وخت کې دا ډول فرمانونه پلي کړي.
د لوی څارنوال په پيغام کې د هېوادوالو پر انساني کرامت او د جمهوري ریاست د فرمانونو پر دقیق او قانوني پلي کېدنې ټینګار شوی و. لوی څارنوال په خپل پيغام کې له بندیانو غوښتي، چې تر ازادېدو وروسته دې د ټولنې نظم ته پام وکړي، چې بیا د مجرم په توګه بندي نه شي.
د افغانستان اسلامي جمهوري دولت لوی څارنوال د بندیانو او د هغوی د کورنیو حقونو ته په درناوي سره ویلي، د بندیانو د بخښنې او بند مودې د کمونې فرمانونو تر صادرېدو وروسته په چټکۍ سره پلي کېږي، چې د دغه فرمان نه ګټه اخیستونکي بندیان ژر تر ژر ترې ګټنه وکړي.
دا په داسې حال کې ده، چې د جمهور رئيس د روان کال د لومړۍ ګڼې فرمان له مخې هم چې د مجاهدینو د بري په مناسبت صادر شوی و، د هېواد په مرکز او ولایتونو کې پلی کړی دی او پر بنسټ يې ځينې بندیان خوشې شوي او د ځینو د بند موده کمه شوې ده.
