لويه څارنوالي د دغې ادارې د بهر نیو اړیکو پالیسي جوړوي
لويه څارنوالي د دغې ادارې په بهرنیو اړیکو پورې د اړوندو چارو د تنظیم او په دې برخه کې د اړینو میکانیزمونو د رامنځته کولو په موخه یوه هراړخيزه پالیسي جوړوي. د دغې پالیسۍ د جوړولو په موخه د لویې څارنوالۍ د پلان او بهرنیو اړیکو ریاست د افغانستان د عدلي سکټور د ملاتړ پروګرام (JSSP) په مرسته د ۱۳۹۷ کال د تلې پر لومړۍ یوه غونډه راوبلله او پر دغې پالیسۍ يې هراړخیزې خبرې وکړې.
د دغې غونډې ګډونوالو وویل، چې د یادې شوې پالیسۍ په مټ به د کارکوونکو لپاره د تحصیلي بورسونو، پاسپورټونو او په کورنيو او بهرنيو کنفرانسونو کې د ګډون لارې چارې او له نورو ادارو سره د دغې ادارې اړیکي د یو ټاکلي او پرمختللي میکانیزم پر اساس تنظیم شي.
دوی همداراز ټینګار وکړ، چې په نژدې راتلونکي کې به دا پالیسي نهايي شي او له مخې به يې اجراات وشي.
