لویه څارنوالي کې ۱۳۰ کانکس خونې ګټې اخیستنې ته وسپارل شوې
په لویه څارنوالي کې د ۱۳۰ کانکس خونو د جوړېدو چارې د ۱۳۹۷ کال د مرغومي پر ۱۲ بشپړې او دا خونې ګټې اخیستنې ته وسپارل شوې.
د دغو کانکس خونو په پرانیسته کې د هېواد لوی څارنوال، د لويې څارنوالۍ مرستیالانو او رئيسانو ګډون کړی و.
ټاکل شوې ده، چې دغو خونو ته د اداري فساد پر ضد د مبارزې مرستیالي چې په دې وروستیو کې د لويې څارنوالۍ په تشکیل کې زیاته شوې، راولېږدول شي.
د دغو کانکس خونو په پرانیسته کې لوی څارنوال څارنپوه محمد فرید حمیدي وویل، چې د لویې څارنوالۍ کارکوونکي له امنیتي ننګونو سره سره د افغانستان د خلکو چوپړ ته چمتو دي او موږ ورته د خپلو چارو په ترسراوي کې توفیق غواړو.
ښاغلي حمیدي زیاته کړه: «د اداري فساد پر ضد د مبارزې د مرستیالۍ په ایجادونې سره د خلکو په زړونو کې یوه هیله غوړېدلې او له نېکه مرغه نن د دغې مرستیالۍ د کارکوونکو د چارو ترسراوي لپاره کارخونې پرانیزو.»
په ورته وخت کې د لوی څارنوال مالي او اداري مرستیال وحیدالدین ارغون د دغو کانکس خونو پرانیسته د اداري فساد پر ضد د مبارزې مرستیالۍ کارکوونکو ته د عدالت د تأمین او د غوره خدمتونو د وړاندې کولو په برخه کې ګټور ګام وباله.
نوموړي وویل: «دا کانکس خونې په درې پوړونو کې د بلاک په ډول په معیاري توګه جوړې شوې، چې د زلزلې او تودوخې د کموالي او زیاتولي پر وړاندې هم مقاومت لري.»
د لوی څارنوال مالي او اداري مرستیال له امنیتي ننګونو څخه خونديتوب، د کاري اسانتیا او روڼتیا رامنځته کول او د اجرااتو د بهیر چټکوالی د دغه کانکس خونونو د جوړېدو ګټې وبللې.
د یادونې وړه ده، چې دا کانکس خونې له ټولګټو وزارت څخه رالېږدول شوې او ۱۲ میلیونه افغانۍ لګښت پرې شوی دی.
