لویه څارنوالۍ کې د حقوقي زده کړیالۍ (د څارنوالۍ ستاژ) آزموینه واخېستل شوه
دا آزموینه د ۱۳۹۸ کال د وږې پر اوومه د مسلکي زده کړو انستېتوت په تالار کې د لویې څارنوالۍ د مالي او اداري چارو مرستیال وحیدالدین ارغون، د بشري سرچینو د پراختیا عمومي رئیس محمد ناصر همت، د کنترول او مراقبت څارنوالي عمومي رئیس محمد نواب احمدزي، د یادې ادارې د ځينو رئیسانو او د کابل پوهنتون د حقوقي زده کړو ملي مرکز د ښوونکو په حضور واخېستل شوه. په دغې آزموینه کې له مرکز او ولایتونو څخه د لویې څارنوالۍ ۱۹۷ کارکوونکو ګډون کړی و.
د لویې څارنوالۍ د مالي او اداري چارو مرستیال وحیدالدین ارغون په دغه پروګرام کې وویل: « د یوې باخبره او قانوني ټولنې لپاره زده کړه د خلکو په کړنلاره او ذهنیت کې مثبت بدلون راولي.» د ښاغلي ارغون په خبره، د څارنوالانو مسلکي او حقوقي زده کړې او ځیرکي د عدالت د ټینګښت په برخه کې د خلکو باور زیاتوي. نوموړي د خپلو خبرو په دوام سره ټینګار وکړ، چې لویه څارنوالي هڅه کوي، د بېلابېلو ښوونیزو پروګرامونو له لارې د یادې ادارې د کارکوونکو ظرفیت لوړ کړي. د ده په خبره، د یادې ادارې د کارکوونکو یوه برخه اوس هم د هېواد په بېلابېلو پوهنتونونو کې د لیسانس او ماسټرۍ په کچه په زده کړو بوخت دي.
د نوموړي د وینا پر بنسټ، د حقوقي زده کړیالۍ (ستاژ) آزموینې ته د ښځینوو په ګډون ۲۶۷ کسانو نوم لیکنه کړې وه، چې د قانوني معیارونو له مخې، له یاد شمېر کسانو څخه د ۴۱ ښځو په ګډون ۱۹۷ کسان د آزموینې په شرایطو برابر و.
په ورته مهال کې، ګډونوالو د آزموینې بهیر له څارنې، روڼوالي او د مسؤولانو له غوره چلند څخه هم خوښي څرګنده کړه.
د یادونې وړ ده، چې د دغې آزموینې پوښتنې د ټاکل شوې کمېټې له خوا په دوو ملي (پښتو او دري) ژبو ترتیب شوې وې او د آزموینې په پایله کې به یوازې ۹۰ بریالي کسان د یو کال لپاره د کابل پوهنتون د حقوقي زده کړو ملي مرکز کې وروزل شي.
