لویه څارنوالۍ کې د مور په شیدو د تغذیې نړیواله اوونۍ ونمانځل شوه
په دغه پروګرام کې چې د ۱۳۹۸ کال د وږي پر پنځمه د مسلکي زده کړو انستیتوت په تالار کې جوړ شوی و، د ښځو پر ضد د تاوتریخوالي د مخنیوي د ابتدایه څارنوالۍ رئیسې شازیې عباسي، د جنډر رئیسې لیدا حیدري، د یادې ادارې ځینو رئیسانو، د عامې روغتیا وزارت د عامه تغذیې ریاست د ظرفیت جوړونې او همغږۍ ارشد مسؤول او د یاد وزارت ځینو کارکوونکو ګډون کړی و.
د ښځو پر ضد د تاوتریخوالي د مخنیوي د ابتدایه څارنوالۍ رئیسې شازیې عباسي په دغه پروګرام کې وویل، چې د مور په شېدو تغذیه د ماشومانو د ذهني او فزیکي ودې او روغ بدن د ساتنې په برخه کې مرسته کوي. آغلې عباسي زیاته کړه: «د مور شیدې د لومړني واکسین په توګه کار کوي او ماشوم له انتاني ناروغیو څخه ژغوري.» د هغې په خبره، د مور په شیدو سره د تغذیې د نړیوالې ورځې له نمانځنې موخه دا ده، چې د مور په شیدو د ماشومانو تغذیه دود شي.
آغلې عباسي د خپلو خبرو په دوام سره زیاته کړه، چې میندې د ماشومانو د سالمې تغذیې لپاره د پلار، کورنۍ د غړو، ټولنې او حکومت نږدې ملاتړ ته اړتیا لري. د عباسي په خبره، یوازې د مور په شېدو د تغذیې د نړیوالې اوونۍ په نمانځنه باید بسنه ونه شي؛ بلکې د بېلابېلو پروګرامونو د جوړنې له لارې دې هڅې وشي، چې په دې برخه کې خلکو ته عامه پوهاوی ورکړل شي. همداراز آغلې عباسي په دې برخه کې د رسنیو رول هم اغېزناک وباله.
د ښځو پر ضد د تاوتریخوالي د مخنیوي د ابتدایه څارنوالۍ رئیسې شازیې عباسي ادارې مکلفې وبللې، ترڅو میندو ته مناسب کاري چاپېریال او شرایط برابر او د شیدو ورکونې او ولادي رخصتیو قانون ته پاملرنه وکړي.
په ورته مهال کې د لویې څارنوالۍ د جنډر رئیسې لیدا حیدري دا پروګرام د ښځو لپاره ځانګړی او بې ساري وباله او د یاد پروګرام له ګډونوالو یې وغوښتل، چې ښځو ته د اړتیا وړ امکاناتو د برابرونې او ښه کاري چاپېریال د خوندیتوب په برخه کې له یاد ریاست سره همکاري وکړي.
له بلې خوا، د عامې روغتیا وزارت د ظرفیت جوړونې او همغږۍ ارشد مسؤول ډاکتر وفی الله حناني په دغه پروګرام کې وویل، چې د مور په شیدو سره د ماشومانو تغذیه د دوی د مړینې مخنیوي کوي. نوموړي د مور په شیدو د تغذيي د دودولو لپاره له ټولو ادارو وغوښتل، چې په دې برخه کې له عامې روغتیا وزارت سره همکاري وکړي. د نوموړي په خبره، عامې روغتیا وزارت د ماشومانو د سوء تغذي د مخنیوي په موخه په هر روغتیایي مرکز کې د تغذیي یو یو مشاور په دنده ګمارلی، ترڅو میندو ته د شېدو خوړونکو ماشومانو او خپله د میندو د تغذیې په اړه مشورې ورکړي.
