لویې څارنوالي د ۱۴۰۰ مالي کال په مرغومي میاشت کې ۲۱۶ عسکري قضيې څېړلې دي
په دغو قضیو کې ۹ قضيې د قتل، ۱ د غلا، ۳۲ قضيې د مالي او اداري جرمونو، ۳ قضيې د نشه يي توکو او ۱۷۱ قضيې هم د وسلو د ورکې، د وظیفوي غیابت، وظیفوي غفلت او د پيسو د حیف و میل د جرایمو په تړاو دي.
د افغانستان اسلامي جمهوري دولت لویې څارنوالي دا قضيې د دغې ادارې د عسکري چارو مرستیالۍ له خوا څېړلې دي.
یادې شوې قضيې د تهامنامو، شواهدو او مدارکو تر ترتیبولو وروسته محکمو ته لېږل شوې دي.
له دې ډلې د ۸۲ قضیو محاکماتي پړاوونه بشپړ شوي او تورن يې په نقدي جزا او حبس محکوم شوي دي او ۹ قضيې د کافي دلایلو د نشتوالي له کبله حفظ او ۱۹۹ هم د تحقیقاتو د بشپړېدا په موخه مسترد شوې دي.
دغو قضیو ته د رسیدګۍ له کبله یو میلیون او ۵۰۵ زره او ۷۴۵ افغانۍ د دولت خزانې ته تحویل شوې او ۱۱۸ میله وسله هم ورسره ضبط شوې ده.
تر ټولو ډېرې جرمي پېښې په کابل، ننګرهار او کندهار کې شوې دي.
