لویې څارنوالۍ ته د پروموټ پروګرام له لوري ۳۶ زده کړندویانې معرفي شوې
د پروموټ پروګرام له لوري ۳۶ زده کړندویانې د ۱۳۹۷ کال د کب پر ۱۴ لويې څارنوالۍ ته معرفي شوې.
د نوموړو د معرفۍ په غونډه کې د بشري سرچینو د پراختیا عمومي رئیس محمدناصر همت، د نظامي کادر او پرسونل رئیس، د پروموټ پروګرام استازي او د لويې څارنوالۍ ګڼو نورو مسؤولانو ګډون کړی و.
دا زده کړندویانې به د لویې څارنوالۍ په مختلفو برخو کې درې میاشتې روزل کېږي او د ازموینې تر اخیستلو وروسته به وړ نجونې په دغه اداره کې په دندو وګومارل شي.
د دغو زده کړندویانو د معرفۍ په غونډه کې محمدناصر همت وویل، چې لویه څارنوالي د حکومت د وجدان حیثیت لري او وجدان چې پاک وي، نو جسم هم روغ او سالم پاتېدای شي.
ښاغلي همت زیاته کړه: «موږ په ۳۲ ولایتونو او ۱۶ ولسوالیو کې څارنوالانې لرو، چې په پوره ډاډ سره خپلې دندې پر مخ بیايي او دا د لویې څارنوالۍ د پام وړ لاسته راوړنه بللی شو.»
د ښاغلي همت په وینا، لويه څارنوالي په وروستیو څو کلونو کې وتوانېده، چې په دغه اداره کې د ښځینه کارکوونکو شمېر له ۳ سلنې څخه ۲۰.۹ سلنې ته ورسوي او دا اداره هڅه کوي، چې دا شمېر تر ۲۰۲۰ کال پورې ۲۴ سلنې ته لوړ کړي.
ښاغلي همت د پروموټ پرورګرام زده کړندویانو ته هم یادونه وکړه، چې تر دې مخکې هم د دغه پروګرام له لوري ۱۲۰ زده کړندویانې لويې څارنوالۍ ته معرفي شوې وې او تر ازموینې اخیستلو وروسته يې په لویه څارنوالي ۱۴ زده کړندویانې په دنده وګومارل شوې.
د بشري سرچینو د پراختیا عمومي رئيس زده کړندویانو ته ډاډ ورکړ، چې د ګومارنې په پروسه کې به تاسو ته لومړیتوب درکول کېږي او همداراز موږ راروان کال هڅه کوو، چې د نظامي څارنوالۍ په برخه کې هم د ښځینه کارکوونکو شمېر ۶ سلنه لوړ کړو.
بل خوا د پروموټ پروګرام استازي محمدنسیم جمالي وویل، پروموټ پروګرام تر دې دمه ۷۰۰ نجونو ته د ملکي خدمتونو په برخه کې کار موندلی او کوښښ کوي، چې تر ۲۰۲۰ کال پورې ۲۱۰۰ نجونو ته مناسبې دندې پیدا کړي.
ښاغلي جمالي زیاته کړه: «کومې زده کړندویانې چې موږ دولتي ادارو ته د روزنې لپاره معرفي کوو، د کار او ټولنیزو چارو وزارت له لوري ورته د کاري تجربې یو کلن سند ورکول کېږي او د همدغه سند په مرسته زده کړندویانې کولای شي، بېلابېلو پوسټونو ته نوملیکنه وکړي.»
د یادونې وړ ده، چې پرموټ پروګرام د ۲۰۱۵ له اپرېل څخه د هېواد په پنځو ولایتونو کابل، ننګرهار، هرات، بلخ او کندهار کې فعالیت لري او تر دې دمه يې ۳۰۵۱ نجونې په مالي، کمپيوټر، بشري سرچینو، تدارکاتي او د پروژې د مدیریت په برخه کې روزلې دي.
