لویې څارنوالۍ د دغې ادارې د کارکوونکو د ظرفیت لوړونې په موخه دوه ورځنی روزنیز پروګرام پیل کړ
لویې څارنوالۍ د دغې ادارې د کارکوونکو د ظرفیت لوړونې په موخه د مسلکي زده کړو په انستېتیوت کې د ۱۳۹۶ کال د مرغومي پر ۱۲ د ښه سلوک او چلند په نامه دوه ورځنی روزنیز پروګرام پيل کړ.
د دغه روزنیز پروګرام په پرانیسته کې د بشري سرچینو رئیس محمد ناصر همت او د ظرفیت لوړونې آمریت مسوولانو ګډون کړی و.
د نوموړي پروګرام په پرانیسته کې د بشري سرچینو رئیس ښاغلي محمد ناصر همت وویل، چې له دې لارې به د لویې څارنوالۍ کارکوونکو ته له مراجعینو سره د ښه چلند اصول ورزده شي.
ښاغلي همت زیاته کړه: «موږ د لويې څارنوالۍ د کارکوونکو د ظرفیت لوړونې په هڅه کې یو، موږ به تر مرکزي ادارې وروسته زونونو او بیا د لويې څارنوالۍ ولایتي څانګو ته ورته روزنیز پروګرامونه وغځوو.»
په نوموړي پروګرام کې د لویې څارنوالۍ مرکزي ادارې ۲۶ کارکوونکو ګډون کړی او د اداري اصولو د زده کړې او له مراجعینو سره د ښه چلند کولو په برخه کې روزنه ترلاسه کوي.
د یادونې وړ ده، چې لويې څارنوالۍ په ۱۳۹۷ مالي کال کې د خپلو کارکوونکو د ظرفیت لوړونې او مهارتونو د لوړاوي په موخه څه باندې ۱۱۲ میلیونه افغانۍ ځانګړې کړې دي.
