لویې څارنوالۍ د ۱۳۹۸ کال په درېیمه ربع کې د عسکري برخې ۸۸۶ جنایي قضیې څېړلې دي
د افغانستان اسلامي جمهوري دولت لویې څارنوالۍ ، د روان کال په درېیمه ربع کې د عسکري برخې ۸۸۶ جنایي قضیې د هېواد د نافذه قوانینو او بشري حقونو په رعایتونې، انساني کرامت ته په درناوي او عدالت ته د خلکو د لاسرسي په موخه په بې پرې او خپلواکه توګه ثبت او څېړلې دي.
له یاد شمېر قضیو څخه ۴۵۶ قضیې د اتهام نامو له ترتیب وروسته ابتدایي محکمې ته استول شوې، چې پر ۹۴ قضیو یې پرېکړه شوې او پاتې یې د همدې محکمې له خوا تر کار لاندې دي.
له دې جملې څخه پر ۱۱۹ قضیو په استیناف محکمه کې پرېکړه شوې، د ۲۰۱ قضیې محاکماتي پړاوونه بشپړ شوي، ۴۴ قضیې د مناسبو دلیلونو د نشتوالي له امله ساتل شوې او ۶۶ نورې مستردې شوې دي.
په یادو قضیو کې ۱۰۸ قضیې د قصدي وژنې، وهنې، ګواښ، لواطت، غلا، دوکې او ځان وژنې په اړه دي. همداراز ۴۸۸ قضیې له واک څخه د ناوړه ګټې اخېستنې، په دنده کې د بې پروایی او غیابت، وسلې ورکونې، ترافیکي پېښو او داسې نورو په اړه دي.
له یادو جرمونو (نغذي جزا، غلا، رشوت او له نشه یي توکو) پنځه میلیونه او ۸۲۸ زره او ۹۶۸ افغانۍ په لاس راغلې، چې د دولتي خزانې په پرېکنده حساب بانک ته سپارل شوې دي.
په یاد راپور کې د راغلې شمېرې له مخې، ډېری پېښې په کابل، ننګرهار، هرات، بلخ، بغلان او کندهار کې شوې دي.
