لویې څارنوالۍ په ۱۳۹۸ کال کې د خبریالانو پر وړاندې د تاوتریخوالي ۱۶ قضیې څېړلې دي
د افغانستان اسلامي جمهوري دولت لویې څارنوالۍ ویاند جمشید رسولي په یوه خبري ناسته کې وویل، چې روان د خبریالانو په ګډون د رسنیو ۲۶ کارکوونکي زیانمن شوي دي.
دا خبري ناسته د لویې څارنوالۍ، د ملي دفاع وزارت، کورنیو چارو وزارت او د سیمه ییزو ارګانونو د خپلواکې ادارې د ویاندویانو، د ژونالیستانو فدراسیون د غړو او د رسنیو فعالانو په ګډون، د ۱۳۹۸ کال د مرغومي پر اتمه د حکومت د رسنیو او اطلاعاتو مرکز کې ترسره شوه.
د ښاغلي رسولي په خبره، دا قضیې په تخار، خوست، زابل، کابل، ننګرهار، هلمند، غزني، باغیس او بغلان کې شوې دي.
د لویې څارنوالۍ ویاند زیاته کړه، دې ادارې په دې وروستیو کلونو کې د خبریالانو پر وړاندې د تاوتریخوالي ۷۸ قضیې څېړلې چې ۳۲ یې د وژنو په اړه دي. د هغه په خبره، د یادو قضیو عاملین له شپږو میاشتو تر ۳۰ کالو په بند، نغدي سزا، ان اعدام محکوم شوي دي.
نوموړي د خپلو خبرو په دوام سره وویل، د افغانستان اسلامي جمهوري دولت لویه څارنوالي ځان د هېوادوالو په ځانګړې توګه د خبریالانو د ازادیو او حقونو مدافع ګڼي او دې مسؤولیت په په کتو سره د خبریالانو پر وړاندې د تاوتریخوالي قضیو ته، چې د بیان ازادۍ او د هېواد د رسنیو پر وړاندې یوه لویه ننګونه ده، په جدي توګه رسیدګي کوي.
د نوموړي په باور، د افغانستان اسلامي جمهوري دولت لویه څارنوالي د بیان ازادي د دولت یوه لویه لاسته راوړنه بولي. په همدې موخه یې ټولې ورته قضیې چې دې ادارې ته رسېدلې، په جدي توګه څېړلې دي.
په دغه کنفرانس کې د ملي دفاع وزارت، کورنیو چارو وزارت او د محلي ارګانونو د خپلواکې ادارې ویاندویانو هم د خبریالانو پر وړاندې د تاوتریخوالي قضیو ته د رسیدګۍ او د بیان ازادۍ د ملاتړ په برخه کې خپل راپورونه وړاندې کړل.
