لوی څارنوال او د هېوادوالو د ستونزو حل
د هېواد لوی څارنوال څارنپوه محمد فرید حمیدي د ۱۳۹۷ کال د چنګاښ پر ۱۸ د هېواد له بېلابېلو ولایتونو څخه د ۳۶ مېرمنو په ګډون له سلو هېوادوالو سره په خپل کاري دفتر کې مخامخ ولیدل. د دغو کسانو له ډلې ۶۷ کسان له کابل څخه، شپږ له بلخ، څلور له کندهاره او نور يې له خوست، پروان، کاپيسا او له نورو ولایتونو څخه خپلې ستونزې او شکایتونه له لوی څارنوال سره شریک کړل.
د دغو ستونزو او شکایتونو له ډلې ۱۸ شکایتونه يې د حقوقي برخې، لس په ضمانت د بندیانو ازادېدنه، ۶ يې تاوتریخوالی او ګڼ نور يې د دوکو (فرېبکارۍ)، غلا او سړي تښتونې په اړه وې. د هېواد لوی څارنوال هغه ستونزې او شکایتونه چې د لويې څارنوالۍ اړوندې نه وې، اړوندو مراجعو ته واستولې.
یاده دې وي، چې هر دوشنبه لوی څارنوال له هېوادوالو څخه د لويې څارنوالۍ اړوندې ستونزې اوري او د هوارۍ په موخه يې مسؤولانو ته لازمې لارښوونې کوي.
دا په داسې حال کې ده، چې لوی څارنوال د تېرې اوونۍ د دوشنبې پر ورځ هم له ۱۰۹ هېوادوالو سره مخامخ په خپل کاري دفتر کې ولیدل او د هغوی ستونزې يې واورېدې.
