لوی څارنوال د ۸۷ هېوادوالو ستونزې مخامخ واورېدې
د هېواد لوی څارنوال څارنپوه محمد فرید حمیدي د ۱۳۹۷ کال د غبرګولي پر ۲۱ د هېواد له ګوټ ګوټ څخه د ۳۶ مېرمنو په ګډون له ۸۷ هېوادوالو سره په خپل کاري دفتر کې مخامخ ولیدل، چې له دې جملې څخه ۱۵ هېوادوالو له ولایتونو او پاتې نورو يې له مرکز څخه خپلې ستونزې او شکایتونه له لوی څارنوال سره شریک کړل. لوی څارنوال د هغوی د ستونزو د هوارۍ په موخه اړوندو مسؤولانو ته لازمې لارښوونې هم وکړې.
د دغو ستونزو او شکایتونو له ډلې ډېری يې په ضمانت د بندیانو ازادېدنه، دوکو، وژنو او د تور پر قضیو راڅرخېدې. د یادو شویو قضیو له ډلې څخه نهه قضیې په ضمانت د بندیانو ازادېدنه، اته قضيې يې د دوکې (فرېبکارۍ) او ګڼې نورې يې د څارنوالۍ اړوند شکایتونه وو.
لوی څارنوال د هرې دوشنبې پر ورځ د هېواد له بېلابېلو ولایتونو او ولسوالیو څخه د لويې څارنوالۍ اړوندې ستونزې له مراجعینو څخه مخامخ اوري.
د یادونې وړ ده، چې لوی څارنوال په تېر هجري لمريز کال کې د هېوادوالو د ستونزو د هوارۍ په موخه تر اووه زرو زیاتو هېوادوالو سره لیدلي دي.
