پنځه کسان د پیسو د ناقانونه لېږدونې په تور محاکمه شول
له یادو پنځو کسانو څخه یو د نیمروز ولایت اوسېدوونکی میرویس د سید احمد زوی او پاتې د غزني ولایت اوسېدونکي هر یو فیروز د علي احمد زوی، محمد نبي د محمد علي زوی، علي احمد د محمد ولي زوی او عبدالطیف د محمد لایق زوی، د اداري فساد له لویو جرمونو سره د مبارزې عدلي او قضایي مرکز له خوا، د ۱۳۹۸ کال د لړم پر ۲۰ له هېواد بهر ته د ۱۰۲ زره او ۹۴۵ امریکایي ډالرو د ناقانونه لېږدونې په تور محاکمه شول.
د مؤظف څارنوال د اتهام نامې پر بنسټ، میرویس او فیروز د محمد نبي، علي احمد او عبدالطیف په همکارۍ متحده عربي اماراتو (دوبۍ) ته ۱۳۶ زره اماراتي درهم، ۱۶۷ زره قطري پیسې، اته زره سعودي ریال او د بحرین هېواد اووه زره او ۶۰۰ روپۍ، چې ټولې له ۱۰۲ زره او ۹۴۵ امریکايي ډالرو سره برابرېږي، لېږدولې، چې د ۱۳۹۷ کال د مرغومي پر اتمه د حامد کرزي نړیوال هوایي میدان د مسافرو د ګمرک عمومي مدیریت د مسؤولینو له خوا د لېږدونې پر مهال ونیول شول او یادې پیسې یې د افغانستان بانک عمومي خزانه دار ته د ټاکل شوي پلاوي په حضور سپارلې او قضیه یې د مظنونو کسانو د عدلي او قضایي تعقیب په موخه څارنوالۍ ته استولی ده.
د قضیې مؤظف څارنوال، د هر اړخیزو څېړنو تر بشپړاوي، د اتهام نامې له ترتیب او د یاد جرم د اثبات لپاره د اسنادو او شواهدو تر راوړنې وروسته د قضایي ناستې له پلاوي غوښتي، چې پر میرویس، فیروز، محمد نبي، علي احمد او عبدالطبیف ته د جزا کود د ۵۰۵، ۵۸، ۷۵ او ۵۹ مادې له مخې جزا ورکړي.
د اداري فساد له لویو جرمونو سره د مبارزې عدلي او قضايي مرکز د ابتدایي محکمې قضايي پلاوي، میرویس د پېسو د ناقانونه لېږدونې په تور د جزا کود د ۵۰۵ او ۵۷ مادې له مخې، په ۳۶ زره افغانیو نغدي جزا او په همدې تور یې هر یو فیروز، محمد نبي، علي احمد او عبدالطیف د جزایي اجرااتو قانون د ۲۰۹ ماې په پام کې نیولو سره د جزا کود د ۵۰۵ او ۵۸ مادې له مخې، پر ۳۵- ۳۵ زره افغانیو نغدي جزا محکوم کړل.
د دغې محکمې قضایي پلاوي، د جزا کود د ۵۰۵ مادې پر بنسټ، د ۷۲ زره او شپږ سوه او ۷۹،۳۴۸ ډالرو د مصادرې په اړه هم حکم ورکړ.
د یادونې وړ ده، چې د محکمې د پلاوي د حکم له مخې، د قضیې تورن میرویس ته د ټولو ضبط شوو پیسو له جملې څخه ۳۲ زره او ۳۶۷ امریکایي ډالر بېرته ورکړل شول.
