په لویه څارنوالۍ کې د مور ورځ ونمانځل شوه
د دغه پروګرام موخه د مور د ورځې نمانځنه وه چې د لویې څارنوالۍ د جنډر رئیسې لیدا حیدري او د دې ادارې د ښځينه کارکوونکو په حضور، د ۱۳۹۷ کال د غبرګولي پر ۲۲ جوړ شو.
د لویې څارنوالۍ د جنډر رئیسې اغلې لیدا حیدري، د دغه پروګرام موخه په ټولنه کې د مور موقف ته درناوی وباله.
ښاغلې حیدري زیاته کړه چې دغه ریاست په پرله پسې توګه په لویه څارنوالۍ کې د ښځو د شمېر زیاتوالي، ظرفیت لوړونې او د دوی د کاري چاپېریال د خوندیتوب په برخه کې کوښښ کوي.
د لویې څارنوالۍ د رهبرۍ پلاوی هڅه کوي چې د ښځو شمېره په یاده شوې اداره کې زیاته شي او له دي سره به د جنډر اصل هم مرعات شي.
د هېواد په ۲۹ ولایتونو کې د تاوتریخوالي د مخنیوي د ۲۹ ښځينه امرانو معرفي او په مرکز او ولایتونو کې د سلو په شا او خوا د ښځینه مسلکي څارنوالانو ګومارنه یو مهم ګام بلل کیږي چې په لویه څارنوالۍ کې د ښځو د ونډې د زیاتوالي او د دوی د ملاتړ په برخه کې اوچت شوی دی.
اغلې حیدري زیاتوي چې په لویه څارنوالۍ کې د ښځو د کاري چاپېریال د خوندیتوب په پالیسۍ کار روان دی او په نږدې راتلونکو کې به بشپړه شي.
نوموړې د لويې څارنوالۍ په کاري چاپېریال کې د ښځو د ځورونې مخنیوي کمېټې د جوړونې خبر هم ورکړ او زیاته یې کړه چې که د ښځو ځورونې په اړه کوم شکایت وشي، د یادې شوې کمېټې لخوا به په جدي توګه څېړل کیږي.
د جنډر ریاست، تر دې مهاله د ښځو د ځورونې د مخنیوي او جنډر په اړه د عامه پوهاوي ډېر پروګرامونه جوړ کړي دي او د دې تر څنګ یې په لویه څارنوالۍ کې د ښځو د ونډې د زیاتوالي په برخه کې هم مهم رول لوبولی دی.
دا په داسې حال کې ده چې د لویې څارنوالۍ رهبري هم په پرلپسې توګه په لویه څارنوالۍ کې د ښځو د شمېرې په زیاتوالي، جنډر مرعاتولو او د دوی د ظرفیت پر لوړونه ټینګار کوي.
