څارنوالانو ته د روزنیزو پروګرامونو په جوړولو سره، د عدلي خدمتونو د وړاندې کولو بهیر پیاوړی کېږي
دا خبره د لویې څارنوالۍ د تدقیق او مطالعاتو رئیس محمد منیر مروت د (جزا کود د عامې برخې) په نوم د پنځه ورځني پروګرام په وروستۍ ورځ وکړه. دا روزنیز پروګرام چې ۳۰ څارنوالانو ته جوړ شوی و، د ۱۳۹۸ کال د غویي پر پنځمه پای ته ورسېد.
د لویې څارنوالۍ د تدقیق او مطالعاتو رئیس په دغه پروګرام کې وویل، چې د یاد حقوقي او روزنیز پروګرام د جوړونې موخه، په ټولنه کې د عادلانه نظم راوستل بلل کېږي. نوموړي څارنوالانو ته په اشارې سره وویل، چې په ټولنه کې د عدالت د تأمینولو لپاره باید هر ډول هڅې وکړي.
له بلې خوا د مسلکي زده کړو انستېتوت رئیس ډاکتر عزیزالله فصیحي د یاد پروګرام د جوړونې موخه، د جزا کود له عامه برخې څخه د څارنوالانو د مسلکي پوهې ترلاسه کول وبلل. ښاغلي فصیحي ټينګار وګړ، څومره چې څارنوالان په خپل مسلک او کار مسلط وي، په هماغه کچه د قانون د تطبیق او د عدالت د تأمین بهیر چټکېږي.
دا په داسې حال کې ده، چې لویه څارنوالي په پرلپسې توګه د څارنوالانو او د یادې ادارې د کارکوونکو د ظرفیت لوړونې په موخه ورته روزنیز پروګرامونه جوړوي.
