کوم شرکتونه چې د دولت پورونه نه پرې کوي، بانکي حسابونه به يې وتړل شي
له حقیقي او حکمي کسانو د دولت د پورونو د حصول کمېسیون وايي، چې د دولت حکمي او حقیقي پوروړي باید خپل پورونه پرې کړي. د یاد کمېسیون د پرېکړې له مخې به د پوروړو شرکتونو بانکي حسابونه وتړي او مسؤولین به یې ممنوع الخروج کړي.
دغه غونډه د لویې څارنوالۍ د اداري فساد له جرمونو سره د مبارزې مرستیال او له حکمي او حقیقي اشخاصو د دولت د پورونو د حصول کمېسیون رئيس په مشرۍ او د نورو غړو په ګډون د ۱۳۹۹ لمریز کال د لیندۍ پر ۱۲ وشوه.
د اداري فساد له جرمونو سره د مبارزې په چارو کې د لوی څارنوال مرستیال او له حکمي او حقیقي اشخاصو د دولت د پورونو د حصول کمېسیون رئيس قیس باوري په دې غونډه کې وویل، چې د بهرنیو چارو وزارت، د کابل ښاروالۍ، د معادن او پټرولیم وزارت، د پایتخت زون اداره او د افغانستان د وسپنې پټلۍ خپلواکه اداره دې د خپلو پورونو په حصول کې جدي او ګړندي ګامونه واخلي.
ښاغلي باوري د بهرنیو چارو وزارت او د پایتخت زون ادارې استازو ته وویل، چې د خپلو پوروړو لېست دې ژر تر ژره له کمېسیون سره شریک کړي، چې وروسته به یې په اړه پرېکړه وشي.
نوموړي همداراز د کابل ښاروالۍ استازي ته وویل: «کوم شرکتونه چې له ښاروالۍ پوروړي وي، ژر تر ژره دې خپل پورونه ترې حصول کړي او هغه شرکتونه چې د پورونو په ورکړه کې ځنډ کوي، حسابونه یې کنګل او مسؤولان دې یې ممنوع الخروج شي.»
د یادونې وړ ده، چې ګلبهار سنټر، پویا ګرافیک، افغان مشعل، آصف عرفان، کریم زرین، خپلواک احمدزی، شهکار، اطلس، شهروند، سند لایټ او حیات شرکتونه د کابل ښاروالۍ پوروړي دي.
په دې غونډه کې پرېکړه وشوه، هغه وزارتونه او خپلواکې ادارې چې تر دې دمه يې له حقیقي او حکمي کسانو د پورونو د حصول کمېټه نه وي جوړه کړې، کمېټه دې د خپلو پوروړو د مشخصولو لپاره جوړه او معلومات دې له کمېسیون سره شریک کړي.
د یادونې وړ ده، له حکمي او حقیقي اشخاصو د دولت د پورونو د حصول کمېسیون د ولسمشر په حکم د اداري فساد له جرمونو سره د مبارزې په چارو کې د لوی څارنوال مرستیال په مشرۍ ایجاد شوی او د دولت له پوروړو د پورونو د راټولولو دنده پر غاړه لري.
