یو کس د دوکې، د القابو د انتحال او کمېشنکارۍ په تور ونیول شو
د لويې څارنوالۍ د کنټرول او مراقبت څارنوالۍ عمومي ریاست یو کس د فریبکارۍ، د القابو د انتحال او کمېشنکارۍ په تور ونیوه. دا کس د لویې څارنوالۍ د شکایتونو او اطلاعاتو ځانګړې ۱۸۰ شمېرې سره د یوه هېوادوال تر اړیکې وروسته د ۱۴۰۰ لمریز کال د وري پر لسمه د دوشنبې پر ورځ ونیول شو.
تورن کس چې خلکو ته يې ځان څارنوال معرفي کړی و، یو کال د نسبتي قضیو د اجرا په پلمه له هېوادوالو پیسې اخیستې. نوموړي د پیسو تر اخیستلو وروسته خپلې اړیکې له هغوی سره پرې کولې او د مبایل شمېره او اوسېدنځای يې بدلاوه.
تر دې دمه د کنټرول او مراقبت څارنوالۍ ته اتو کسانو له دغه تورن څخه شکایتونه کړي دي. تورن کس له څه مودې راهیسې تر تعقیب لاندې و، چې د کابل پولیسو په همغږۍ د کابل د ۱۶ ناحیې په قلعه زمان خان سیمه کې په داسې حال کې ونیول شو، چې په ښځینه جامو کې له کوره په تېښته و.
دا په داسې حال کې ده، چې د لويې څارنوالۍ د کنټرول او مراقبت څارنوالۍ د روان کال د وري پر اتمه هم یو کس له هېوادوالو د باج اخیستنې په تور نیولی و.
د افغانستان اسلامي جمهوري دولت لویه څارنوالي د اداري فساد پر ضد پرېکنده مبارزه کړې او د قانون د پلي کېدو او د عدالت د ټینګښت په برخو کې به له هېڅ هانده مخ وانه ړوي.
