۶۴ زده کړندویان په لویه څارنوالي کې جذبېږي
په همدې موخه یوه ازموینه د ۵۰۹ کسانو په ګډون د ۱۴۰۰ لمریز کال د وري پر اتمه د لويې څارنوالۍ د کنفرانسونو په تالار کې ترسره شوه. په دې ازموینه کې د نجونو او هلکانو په ګډون ۸۸۶ کسان چې په ۱۳۹۸ او ۱۳۹۹ لمریز کال کې له حقوق او شرعیاتو پوهنځي فارغ شوي وو، نوملیکنه کړې وه.
دا کسان د لویې څارنوالۍ، د ملکي خدمتونو د انستیتیوت او د قانون د حاکمیت د ملاتړ پروژه (GIZ) ترمنځ د لاسلیک شوي هوکړه لیک پر اساس به حذب شي. د ښځو د ملاتړ رئیسې لیدا حیدري د دغه ازموینغونډې په پيل کې وویل: «د زده کړندويۍ په دې پروګرام کې به ۷۰ سلنه ښځینه زده کړندویانو او ۳۰ هم نارینه وو ته ونډه ورکړل شي.»
د اغلې حیدري په وینا، له ۴۶ زده کړندویانو ۴۰ تنه د یوه کال لپاره په مرکز او ۲۴ هم په ولایتونو کې جذب شي. نوموړې زیاته کړه، هغه کسان چې په مرکز کې جذبېږي، د یوه کال لپاره به زده کړه ترلاسه کړي او ۲۴ نور کسان به د بدخشان، تخار، کندوز، بغلان، بلخ او جوزجان استیناف څارنوالیو کې د شپږو میاشتو لپاره د زده کړندويۍ دوره بشپړه کړي.
د ښځو د ملاتړ رئيسې وویل: «لویه څارنوالي د دغو زده کړندویانو د کاري مودې تر پای ته رسېدو وروسته د یادو کسانو د ګومارنې مکلفیت نه لري؛ خو د پوسټونو د اعلانو په صورت کې به دوی ته لومړیتوب ورکړل شي.»
دا پروګرام د GIZ دفتر په مالي او تخنیکي مرستې او د ملکي خدمتونو انستیتیوت په همکارۍ ترسره شوې ده. لویې څارنوالۍ تر دې مخکې هم د زده کړندويۍ څو نور پروګرامونه هم ترسره کړي دي.
