لويې څارنوالۍ کې د آرشیف، اداري مراسلاتو او دوسیه بندۍ روزنیز پروګرام وشو
د لويې څارنوالۍ د بشري سرچینو د پراختیا عمومي ریاست د زده کړو او ظرفیت لوړاوي آمریت د آرشیف، اداري مراسلاتو او دوسیه بندۍ دوه ورځنی روزنیز پروګرام د ۱۳۹۷ کال د چنګاښ پر 11 د لويې څارنوالۍ په دارالامان ودانۍ کې ترسره کړ.
دا پروګرام د لويې څارنوالۍ د مرکز او د کابل د څلورو زونونو د آمرانو لپاره ترسره شو او نژدې ۲۰ آمرانو پکې ګډون کړی و.
د یاد شوي پروګرام موخه د ادارې د اساسي مهارتونو په برخه کې د ګډونوالو د پوهې لوړاوی او د ادارې د اسنادو غوره ساتنه بلل شوې ده.
صبور نبيزاده د دغه پروګرام یو ګډونوال دا ډول پروګرامونه اړین وبلل او زیاته يې کړه، چې په په یاد شوي پروګرام کې تر ګډون وروسته به وکولای شي، مراجعینو ته غوره خدمات وړاندې کړي.
له بلې خوا نوريې دروېش هم د ادارو کارکوونکو ته د روزنیزو پروګرامونو ترسراوی یو اصل وګاڼه او زیاته يې کړه، چې دا ډول پروګرامونه د کارکوونکو د ظرفیت په لوړاوي کې خورا مرسته کولای شي.
د یادونې وړ ده، چې د بشري سرچینو د پراختیا عمومي ریاست د لویې څارنوالۍ د کارکوونکو د ظرفیت لوړونې لپاره پرله پسې هڅه کوي او تر دې وړاندې يې هم د ولایتونو د محاسبې مدیرانو ته د ظرفیت لوړاوي په موخه څلور ورځنی روزنیز پروګرام جوړ کړی و.
