مطبوعاتي خبرپاڼه
۱۳۹۷ کال د سلواغې ۲۳
کابل- افغانستان
د ټاکنو او د ټاکنیزو شکایتونو د کمېسیونونو رئيسان او د دغو کمېسونونو پخواني غړي ممنوع الخروج شوي دي.
د افغانستان اسلامي جمهوري دولت لویې څارنوالۍ، د کشفي ادارو له خوا د ټاکنیزو شکایتونو او د ټاکنو خپلواک کمېسیون د رئیسانو او دولسو پخوانیو غړو له واک څخه د ناوړه ګټې اخېستنې په تور دغې ادارې ته د رارسېدلې قضیې د څېړنې په موخه یو پلاوی ټاکلی دی.
ټاکل شوي پلاوي د ټاکنیزو شکایتونو او د ټاکنو د خپلواک کمېسیون پر رئیسانو او د یادو کمېسیونو پر دولسو پخوانيو غړيو، د هراړخیزو او بشپړو تحقیقاتو او څېړنو په موخه له هېواد بهر ته پر تلو بندیز لګولی دی.
د افغانستان اسلامي جمهوري دولت لویه څارنوالي ډاډ ورکوي، چې یاده قضیه به په عادلانه، منصفانه، بې پرې او خپلواکه توګه د قانون د احکامو په رڼا کې وڅېړي او د هغه اسنادو او شواهدو ته چې د کشفي ادارو او مسؤولو وګړیو له خوا یاد شوي پلاوي ته د څېړنې پر وخت ورکول کېږي، رسیده ګي کوي. همداراز لویه څارنوالي به د دغو قضیو په اړه د خپل مسؤولیت او نامسؤولیت له مخې قانوني پرېکړه وکړي او د خپلې پرېکړې جزیات به له هېوادوالو سره شریک کړي.
د افغانستان د اسلامي جمهوري دولت د لویې څارنوالۍ د ویاند دفتر
