د جمهوري ریاست له تقویتي فرمان څخه د څرخي پله زندان ۸۰۰ بندیان برخمن شول
دغه بندیان د جمهوري ریاست د ۲۳۶ ګڼې تقویتي فرمان له مخې د ۱۳۹۷ کال د کب پر ۲۸ ځینې ازاد او د ځینو د بند موده کمه شوه.
په دغه پروګرام کې د جمهوري ریاست د فرمانونو د تطبیق کمېټې رئیس او د احکامو د تنفیذ او د حبس پر بدیل د نظات څارنوالۍ عمومي رئیس څارنیال محمد اسعد ساپي، د څرخي پله زندان رئیس مل پاسوال زلمي منګل او د جمهوري ریاست د فرمانونو د تطبیق کمېټې د کمېسیون ځینو غړیو ګډون کړی و.
د دغه فرمان پر اساس ۸۰ بندیانو ته عفوه وشوه او د ۷۲۰ بندیانو د بند موده کمه شوه.
په دغه پروګرام کې، د جمهوري ریاست د فرمانونو د تطبیق کمېټې رئیس او د احکامو د تنفیذ او د حبس پر بدیل د نظات څارنوالۍ عمومي رئیس څارنیال محمد ساپي وویل، چې لویه څارنوالۍ تل د هېوادوالو له ازادۍ ملاتړ کوي او د دوی ازادۍ ته درناوی لري. د ښاغلي ساپي په خبره، هغه کسان چې په تکراري ډول د جرم مرتکب کیږي، په راتلونکو فرمانو کې به ورسره دا ډول چلند ونه شي. نوموړي بندیانو ته په اشاره سره وویل: «دا چې ازادي د خدای نعمت دی؛ نوهیله من یم، چې په زندان کې مو له تېر کړي وخت پند اخېستی وي او له دې وروسته خپلې ازدۍ ته پاملرنه وکړئ.»
د یادونې وړ ده، چې د یاد شوي فرمان لومړۍ دوره د څرخي پله زندان کې تطبیق شوه او بله دوره به یې په نږدې راتلونکو کې په ولایتي زندانونو کې هم تطبیق شي.
