درې کسان هېواد ته د پېسو د ناقانونه واردولو په تور محاکمه شول
دغه درې کسان د اداري فساد له لویو جرمونو سره د مبارزې عدلي او قضایي مرکز د استیناف محکمې له خوا هېواد ته د پېسو د ناقانونه واردولو په تور د ۱۳۹۸ کال د وري پر ۲۰ په علني ډول محاکمه شول.
په دغه قضایي ناسته کې، د صراف منشي عمر خان د برات خان زوی، نصرت الله د عجب ګل زوی او د ننګرهار او تورخم لارې موټروان عزت الله د صمد خان زوی چې پاکستانی دی، محاکمه شول.
د یادې ناستې د قضایي پلاوي د پرېکړې پر بنسټ، عمر خان او نصرت الله د پیسو د ناقانونه واردولو په تور د جزا کود د ۵۷، ۵۸ او ۵۰۵ مادې لومړۍ فقرې له مخې، پر پنځوـ پنځو میاشتو تنفیذي بند محکوم شول.
د یادې ناستې قضایي پلاوي، عزت خان ته د پیسو د ناقانونه واردولو د تور په اړه د کافي او لازمو دلایلو د نشتوالي له امله د جزایي اجرااتو قانون د ۲۳۵ او ۱۹ مادې څلورمې فقرې په رعایتونې د جزا کود د پنځمې مادې پر اساس برائت ورکړ.
د دغې قضایي ناستې رئیس، د یو سل او پنځوس زره سعودي ریالو، د سل زره اماراتي درهمو او ۱۵ زره یورو د مصادرې په اړه حکم صادر کړ.
همداراز په دغه قضایي ناسته کې، د یو سوزکي موټر په اړه، چې څښتن ته یې باید په قانوني توګه د معتبرو اسنادو له مخې تسلیم شي، حکم صادر شو.
د یادونې وړ ده، چې د یاد شوي مرکز ابتدایي محکمې عمرخان او نصرت الله د پېسو د ناقانونه وارې په تور په پنځوـپنځو میاشتو تنفیذي بند محکوم کړي و او عزت الله یې د پیسو د ناقانونه واردولو د تور په اړه د کافي او لازمو دلایلو د نشتوالي له امله برائت ورکړی و.
