د آته لکه او پنځه څلوېښت زره امریکایي ډالرو د اختلاس په تور درې کسان محاکمه شول
د افغانستان اسلامي بانک کې د جعل، تزویر او اختلاس په تور درې کسان د ۱۳۹۸ کال د چنګاښ پر پنځمه د اداري فساد له لویو جرمونو سره د مبارزې د عدلي او قضایي مرکز د ابتدایي محکمې له خوا په علني ډول محاکمه شول.
قضیې څېړنې ته ټاکل شوي پلاوي، له څېړنو او د صورت دعوې له ترتیب وروسته، یاده قضیه محکمې ته واستوله. یاد څارنوال دوی ته د ۳۹۲، ۴۳۷، ۷۲۵ او ۷۱۴ مادې په رعایت د جزا کود د ۷۳، ۵۹ او ۱۴ مادې له مخې د جزا غوښتنه کړې ده.
په دغه قضیه کې، د افغانستان د اسلامي بانک کارکوونکی محمد الیاس د عبدالقهار زوی، د خاوریان شرکت کارکوونکی محمد موسی د محمد علی زوی او د یاد بانک چوکي دار(ساتونکی) بریالی د محمد حسن زوی محاکمه شول.
د ناستې قضایي پلاوي، محمد الیاس د اساسي قانون د ۲۵، د جزا کود او د جزايي اجرااتو قانون ۵مو مادو له مخې، د مناسبو دلیلونو د نشتوالي له امله بری الزمه وباله، محمد موسی په تزویر کې د همکارۍ په تور د جزا کود د ۵۹ او ۴۳۹ مادې له مخې، د توقیف ورځو په شمول په شپږو میاشتو تنفیذي بند او بریالۍ یې د جزا کود د ۷۳ مادې له مخې په یو کال او شپږو میاشتو تنفیذي بند محکوم کړ.
د قضايي پلاوي د پرېکړې پر بنسټ، د اتصالات مخابراتي شرکت کارکوونکي محمد شریف او ضمیر احمد، مبایل خرڅوونکي وحیدالله او سید سلیمان، د کابل چتګر وکیل ګذر او د اسلامي بانک هغه کارکوونکي چې نورالله نومي کس ته یې بانکي حساب پرانېستی، د عدلي تعقیب وړ وبلل.
