د ۱۳۹۸ کال په لومړیو اتو میاشتو کې د اداري فساد د قضیو په تړاو ۳۷۳ کسان بندیان شوي دي
د افغانستان اسلامي جمهوري دولت لویې څارنوالۍ، د اداري فساد پر وړاندې د مبارزې برخه کې د خپلې ژمنې او مسؤولیت په درک کولو سره تل له یادې ناوړه پدیدې سره جدي او پرېکنده مبارزه کوي او د هېواد د نافذه قوانینو له مخې، فساد کړونکي تر عدلي تعقیب لاندې نیسي.
د یادې ادارې رهبري باوري ده، چې له اداري فساد سره مبارزه وخت غواړي او قضیې یې باید په جدیت او ځیرکۍ سره وڅېړل شي. له همدې امله د دغې ادارې د رهبرۍ او کارکوونکو مبارزه باید پرېکنده او په جدیت سره دوام ومومي، څو یاده پدیده د هېواد په کچه له منځه ولاړه شي.
راپورونه ښيي، چې د اداري فساد قضیو ته رسیدګي مخ په پورته روانه ده. د روان کال په لومړۍ میاشت کې د یادو قضیو محکومین یو زر او ۵۰۴ او په زمري او وږي میاشت کې یو زر او ۷۸۷ کسان و؛ خو اوس د اداري فساد د قضیو په تړاو یو زر او ۸۷۷ کسان بندیان دي.
دا کسان د اداري فساد په بېلابېلو قضیو تورن شوي، چې قضیې یي په مرکز او ولایتونو کې له څېړنو او د جرم د اثبات لپاره د اسنادو او شواهدو تر راوړنې وروسته محکومو ته استول شوې دي.
دا تورن د محکمو له خوا؛ پر بند ورکولو سربېره، په ۲۴۹ میلیونه و ۳۵۲ زره او ۶۸۰ افغانیو او ۱۰۸ زره او ۳۰۸ امریکایي ډالرو نغدي جریمه محکوم شوي دي. له دې جملې، ۱۱۳ میلونه و ۲۴۶ زره او ۳۶۵ افغانۍ او ۴۲ زره او ۳۳۹ امریکایي ډالر د دولت خزانې ته سپارل شوي دي.
هېره دې نه وي، چې له اداري فساد سره جدي مبارزه د افغانستان اسلامي جمهوري دولت لویې څارنوالۍ کاري لومړيتوب دی او هغه کسان چې په دې جرمونو محکوم دي، د جمهوري ریاست د بښنې او بند مودې کمونې له فرمانونو هم بې برخې دي.
