په عامه روغتیا وزارت کې څلور کسان د رشوت غوښتلو په تور ونیول شول

په عامه روغتیا وزارت کې څلور کسان د رشوت غوښتلو په تور ونیول شول د عامې روغتیا وزارت د څو کارکوونکو د شکایت پر اساس چې له دوی څخه د یاد شوي وزارت اړوند ځایونو کې رشوت غوښتل شوی، د کنټرول او مراقبت څارنوالۍ ریاست د ملي امنیت د عمومي ریاست په همغږي، دا څلور کسان د ۱۳۹۹ لمریز کال د مرغومي پر ۸ ونیول. دا څلور کسان دمګړۍ په توقیف کې دي او تر تحقیقاتو وروسته به د دوی د مسؤولیت درجه، عدم مسؤولیت او الزامیت ثابت او له هېوادوالو سره به شریک شي. د افغانستان اسلامي جمهوري دولت لویه څارنوالي د هېواد د نافذه قوانینو له مخې د اسنادو او شواهدو پر اساس خپل تحقیق په بې پرې، خپلواکه او عادلانه توګه ترسره کړی او پایلې به يې له هېوادوالو سره شریکې شي. د هېواد لویه څارنوالي یو ځل بیا د قانون د حاکمیت، له اداري فساد د مبارزې او د عدالت د تأمین په موخه د هېوادوالو، رسنیو او مدني ټولنو پر مشارکت او ګټور رول ټینګار کوي.