په عسکري برخه کې لویې څارنوالۍ د ۱۴۰۰ مالي کال په لومړۍ ربع کې ۶۰۴ جنايي قضیو ته رسیدګي کړې
د افغانستان اسلامي جمهوري دولت لویې څارنوالۍ د روان مالي کال په جدي، دلو او حوت میاشتو کې د عسکري مرستیالۍ له خوا، ۶۰۴ جنايي قضیو ته رسیدګي کړې ده.
په دغو قضیو کې ۲۶ قضيې د قتل، ۸ د غلا، ۱ د اخلاقي جرمونو، ۷ د نشه يي توکو، ۲ د ترافیکي جرایمو، ۲۴ د اداري فساد او همداراز ۵۳۶ قضيې د نورو جرایمو په تړاو دي.
له دې ډلې د ۲۴۷ قضیو محاکماتي پړاوونه بشپړ شوي او تورن يې له درېیو میاشتو تر ۳۰ کالو تنفیذي حبس محکوم شوي دي او ۱۱ قضيې هم د الزام د کافي دلایلو نشتوالي له کبله حفظ شوې او ۴۶۲ موارده هم اړوندو مراجعو ته لېږل شوې دي.
یادو شویو قضیو ته د رسیدګۍ له درکه پنځه میلیونه او ۴۱۳ زره او ۷۹۴ افغانۍ د نقدي جریمې په توګه د دغې مرستیالۍ له خوا تثبیت او د دولت قطعي حساب ته لېږل شوې دي.
د وړاندې شویو شمېرو له مخې تر ټولو ډېرې پېښې په کابل، ننګرهار، کندهار او هرات ولایتونو کې ثبت شوې دي.
