د شهیدانو او معلولینو وزارت دوه کارکوونکي د رشوت په تور ونیول شول
د کنټرول او مراقبت څارنوالۍ عمومي ریاست د شهیدانو او معلولینو وزارت د تدارکاتو کارکوونکي او د خریدارۍ هیات په بالفعل ډول د ۲۵ زره افغانیو رشوت اخیستو په تور ونیول. د دغې قضیې تورن د یوه خصوصي شرکت د اطلاع له مخې، چې د نوموړي وزارت سره یې د آی ټي برخې څیزونو د تدارک په موخه قرارداد درلود، له ملي امنیت عمومي ریاست سره د ګډو عملیاتو په پایله کې د ۱۴۰۰ لمریز کال د غوایي پر ۱۹ ونیول شول.
شکایت کوونکي د کنټرول او مراقبت څارنوالۍ عمومي ریاست ته خپله عریضه کې لیکلي، چې د قضیې تورنو د خریدارۍ د لاسلیک په بدل کې له نوموړي ۲۵ زره افغانۍ غوښتې دي.
د کنټرول او مراقبت څارنوالۍ عمومي ریاست د شکایت کوونکي د شکایت له ارزونې او د هېواد د لویې څارنوالۍ مقام له هدایته وروسته، تورن د کابل ښار د لسمې حوزې د عبدالحق څلورلارې کې د یادو شویو پیسو د اخیستو پر وخت ونیول.
قضیه د تحقیقاتو د بشپړاوي او د تورنو د عدلي تعقیب په موخه اړوندې څارنوالۍ ته استول شوې ده.
له اداري فساد سره مبارزه د لویې څارنوالۍ له لومړیتوبونو څخه ده، له همدې امله د کنټرول او مراقبت څارنوالۍ عمومي ریاست دوه ورځې مخکې هم د افغانستان برښنا شرکت یو کارکوونکی د رشوت اخیستو په تور ونیوه.
