د لويې څارنوالۍ عالي شورا غونډه وشوه
د لویې څارنوالۍ عالي شورا غونډه د افغانستان اسلامي جمهوري دولت لویې څارنوالۍ سرپرست محترم ذبیح الله کلیم په مشرۍ او د دغې غونډې د نورو غړو په ګډون د ۱۴۰۰ لمریز کال د غبرګولي پر ۱۵ وشوه.
د هېواد د لویې څارنوالۍ سرپرست محترم ذبیح الله کلیم د عالي شورا غونډې غړو ته په اشارې وویل، چې هڅه دې وشي، د خلکو ستونزې په ښه توګه حل او د قانون د تطبیق او د عدالت په تأمین کې له هېڅ هانده مخ وانه ړول شي.
د غونډې په لومړۍ برخه کې په جزايي دعوا کې د مرور زمان عملي قاعدې د تطبیق په تړاو بحث وشو.
د عالي شورا غړو د موضوع په تړاو تر هراړخیز بحث وروسته د استهدااتو کمېټې نظر تائيد کړ او تدقیق او مطالعاتو څارنوالۍ عمومي ریاست ته یې دنده وسپارله، چې د موضوع په تړاو د قانون د مادو د تعدیل طرح دې ترتیب او اړوندو مراجعو ته ولېږي.
همداراز یوې موظفې کمېټې ته يې دنده وسپارله، چې د مرور زمان د قضیو دقیق شمېر دې راټول او د عالي شورا یوې غونډې ته دې وړاندې کړي.
د غونډې په دویمه برخه کې د جرایمو د تحقیق رئیس له خوا د لغمان استیناف څارنوالۍ ریاست د یوه څارنوال او اجرايي مدیر د وظیفوي جرمي سرغړاوي قضيې راپور غونډې ته وړاندې شو.
د عالي شورا غړو د راپور تر اورېدو وروسته، تصمیم ونیوه، چې د یادو شویو کسانو دنده دې وځنډول شي او د اداري فساد پر ضد د مبارزې څارنوالۍ رئیس او د دوو څارنوالانو په غړیتوب د دې موضوع په تړاو تحقیق وکړي.
د غونډې په درېیمه برخه کې د دایکندي استیناف څارنوالۍ ریاست پر استهدایې چې د صعب العلاجه بندیانو د ناروغیو د تشخیص او تثبیت په تړاو وه، بحث وشو.
د لويې څارنوالۍ عالي شورا غونډې د موضوع په تړاو تر بحث وروسته استهدااتو ته د رسیدګۍ کمېټې تصمیم تائید کړ. د دغې کمېټې په تصمیم کې راغلي، چې د جمهوري ریاست عالي مقام د ۱۳۹۸/۱۲/۶ د ۳۹ ګڼې فرمان پر اساس د زندانونو چارو د تنظیم قانون توشیح او نافذ شوی دی چې د صعب العلاجه محجوزینو او محبوسینو د ناروغۍ تثبیت او تشخیص يې په ۲۸ او ۲۹ مادو کې په ډاګه شوی دی.
همداراز د احکامو د تنفیذ څارنوالۍ ریاست ته یې دنده وسپارله چې په ۱۳۹۹ لمریز کال کې د کرونا ویروس د خپرېدو د مخنیوي په موخه د ازادو شویو بندیانو کره شمېره ترتیب او د عالي شورا راروانې غونډې ته یې وړاندې کړي.
