لویې څارنوالۍ په عسکري برخه کې ۱۵۷ قضیو ته رسېدنه کړې
د افغانستان اسلامي جمهوري دولت لویې څارنوالۍ د ۱۴۰۰ لمریز کال په غبرګولي میاشت کې د عسکرۍ مرستیالۍ له لارې ۱۵۷ جنايي قضیو ته رسېدنه کړې.
په دغو قضیو کې اووه قضيې د قتل، پنځه د غلا، دوه د ترافیکي جرمونو، درې د اداري فساد او همداراز ۱۴۰ مورده هم د وظیفوي غفلت، د وسلو او نظامي تجهیزات د ورکولو، په دنده کې تعلل، غیابت او نورو جرمونو په تړاو دي.
له دې ډلې د ۵۱ قضیو محاکماتي پړاوونه بشپړ شوي او تورن يې په نقدي جزا او بند محکوم شوي او شپږ قضيې هم د الزام د کافي دلایلو د نشتوالي له کبله حفظ او ۱۰۰ نورې قضيې اړوندو مراجعو ته لېږل شوې دي.
یادو شویو قضیو ته د رسیدګۍ له درکه یو میلیون او ۳۲۶ زره او ۲۴۰ افغانۍ نقدي جزا د عسکري مرستیالۍ له خوا تثبیت او د دولت قطعي حساب ته لېږل شوې ده.
د یادو شویو شمېرو له مخې، په غبرګولي میاشت کې په ترتیب په کابل، ننګرهار، کندهار او ارزګان ولایتونو کې تر ټولو ډېرې قضيې ثبت شوې دي.
