د کابل شمال ختیځ زون استیناف څارنوالۍ ۹۴ جرمي قضيو ته رسېدنه کړې
د کابل د شمال ختیځ زون استیناف څارنوالۍ ریاست د ۱۴۰۰ مالي کال په دویمه ربع کې ۹۴ قضیې د تحقیق، اتهامنامو او صورت دعوا تر ترتیب وروسته محکمو ته لېږلې دي.
په دغو قضیو کې دوه قضيې د قتل، ۴۱ د غلا، ۱۲ د نشه يي توکو، شپږ د ترافیکي جرمونو، ۱۱ د اداري فساد او ۲۲ هم د نورو متفرقه جرایمو په تړاو دي.
له دې ډلې ۴۰ قضيې نهايي شوې او تورن یې په نقدي جزا او حبس محکوم شوي دي او ۸۲ قضيې ابتداییه او استیناف محکمو ته لېږل شوې دي او دوه قضيې د الزام د کافي دلایلو د نشتوالي له کبله حفظ شوې دي.
د یادو شویو شمېرو له مخې، تر ټولو ډېرې قضيې د غلا د جرایمو په تړاو ثبت شوې دي.
دغو قضیو ته د رسېدنې له درکه، د یاد ریاست له خوا دوه میلیونه او ۳۸۲ زره او ۸۹۶ افغانۍ نقدي جزا تثبیت او ۹۱۶ زره او ۸۹۶ افغانۍ په مانت ډول او یو میلیون او ۴۶۶ زره افغانۍ د دولت قطعي حساب ته لېږل شوې دي.
همداراز شپږ میله کمري وسله او څه اندازه نشه يي توکي او الکولي مشروبات هم ضبط شوي دي.
