د زندانونو د چارو د تنظیم ادارې له رئیس سره د لویې څارنوالۍ د سرپرست لیدنه
د افغانستان اسلامي جمهوري دولت سرپرست لوی څارنوال محترم ذبیح الله کلیم د زندانونو د چارو د تنظیم ادارې له رئيس حمیدالله طهماسي سره د ۱۴۰۰ لمریز کال د چنګاښ پر درېيمه په لویه څارنوالي کې ولیدل.
د دغې لیدنې موخه د بندیانو د ستونزو هواری، د همکاریو پياوړتیا او د لویې څارنوالۍ او د زندانونو د چارو تنظیم ادارې ترمنځ لا همغږي بلل شوې ده.
ښاغلي کلیم په دې ناسته کې د لویې څارنوالۍ او د زندانونو د چارو د تنظیم ادارې ترمنځ پر همغږۍ ټینګار وکړ او ويې ویل، د دواړو ادارو په همغږۍ سره به په بندخونو کې د بندیانو ستونزې په سمه توګه حل شي، چې له یوې خوا به عدالت تأمین او له بلې خوا به د هېوادوالو حقوق ضایع نه شي. د نوموړي په وینا، لویه څارنوالي د عدالت تأمین او د قانون واکمنۍ ته ژمنتیا لري او په دې برخه کې پوره پوره کوښښ کوي.
په ورته وخت کې د زندانو د چارو د تنظیم ادارې رئيس حمیدالله طمهاسي د همکارۍ تر څنګ وویل، چې دا اداره هڅه کوي، له لویې څارنوالۍ سره په همکارۍ او همغږۍ د بندیانو ستونزو ته رسېدنه وکړي.
همداراز په دې ناسته کې تصمیم ونیول شو، چې دواړه ادارې به یوه کمېټه جوړوي، چې په مرکز او ولایتونو کې د بندیانو ستونزو ته رسیدګي او د قانون له مخې پر وخت د بندیانو د برخلیک نظارت وکړي. همداراز دا کمېټه به شته ننګونې مشخصې او د هواري لپاره به یې د نافذه قوانینو پر اساس اجراات کوي.
