د فاریاب استیناف څارنوالۍ رئيس د دغه ولایت د زندان لیدنه وکړه
د فاریاب استیناف څارنوالۍ رئيس څارنیار حسیب الله بهادر د ۱۴۰۰ لمریز کال د چنګاښ پر اتمه د دغه ولایت د زندان او د ماشومانو د روزنې مرکز لیدنه او له محبوسینو سره یې له نژدې د دوی د ستونزو په اړه خبرې وکړې.
د دغه لیدنې موخه په فاریاب ولایت کې د بندیانو ستونزو ته رسیدګي بلل شوې ده.
د ښاغلي بهادر په وینا، د فاریاب د زندان په عمومي مدیریت کې ۴۴۲ تنه بندیان دي، چې له دې ډلې د ۲۸۵ بندیانو دوسيې نهايي شوې او د ۱۵۷ نورو بندیانو دوسیې د سترې محکمې د عمومي جزا څارنوالۍ ریاست، له ښځو سره د تاوتریخوالي او د مرکز په ځینو نورو څارنوالیو کې تر قانوني دوران لاندې دي.
د نوموړي په وینا، په دغه ولایت کې د څه مودې لپاره د مخابراتو ریاست د پسټي خدمتونو د بندیز له امله، د دغو بندیانو نهايي پرېکړې د فاریاب استیناف څارنوالۍ ته رارسېدلې نه دي.
د ښاغلي بهادر په وینا، په دغه ولایت کې د بندیانو له ډلې، ۱۰ ښځینه بندیانې شتون لري، چې د اتو بندیانو دوسيې نهایي شوې او د دوو نورو تر توقیف لاندې دي. د نوموړي په وینا، د دغو دوو کسانو دوسیې تر قانوني پړاو لاندې دي او ډېر ژر به نهايي شي.
همداراز د یوې نجلۍ په ګډون درې محجوزان د ماشومانو د روزنې په مرکز کې دي، چې د دوو دوسيې نهايي شوې او د یوه بل دوسيه دویمې محکمې ته لېږل شوې ده.
د فاریاب استیناف څارنوالۍ رئيس له هغو بندیانو سره چې دوسيې يې تر محاکماتي دوران لاندې دي، ژمنه وکړه، چې دوسيې به يې ډېر ژر نهايي شي او لویه څارنوالي د زندانونو چارو د تنظیم ادارې په مرسته په دې برخه کې جدي هڅه کوي.
