د اداري فساد په تور د دوو څارنوالانو دندې وځنډېدې
د کنټرول او مراقبت څارنوالۍ د عمومي ریاست په وړاندیز، د اداري فساد په تور، د کاپيسا د کورني او بهرني امنیت جرایمو پر ضد د مبارزې څارنوالۍ ریاست د تحقیق څارنوال او د تخار، چال ولسوالۍ د ابتداییه څارنوالۍ د تحقیق آمریت څارنوال دندې د لویې څارنوالۍ له خوا وځنډېدې.
دا څارنوالان د یوه هېوادوال تر شکایت وروسته چې نوموړو تورنو ترې پيسې غوښتې وې، تر تعقیب لاندې راغلي دي. اوسمهال لویه څارنوالي دا مسأله په جدي توګه څېړي.
د افغانستان لویه څارنوالي د قانون یوشان تطبیق ته ژمنه ده او دغې ادارې ته هېڅوک تر قانون لوړ نه دی.
