د کندهار په سپين بولدک ولسوالۍ کې د لسوګونو افغانانو د وژنې قضیې د ارزولو په تړاو د لویې څارنوالۍ اعلامیه
کابل – افغانستان، ۱۴۰۰، زمري ۳
د کورنيو رسنیو او نړیوالو بنسټونو د خپرو شویو راپورونو پر اساس، لسګونه افغانان د بشرضد عناصرو له خوا د کندهار په سپين بولدک ولسوالۍ کې وژل شوي دي.
د نړیوالو تړونونو په رڼا کې، دا پېښه د نړیوال جرم دی او د افغانستان جزا کوډ هم د نسل وژنې او جنګي جنایت په توګه جرم بللی دی.
د افغانستان اسلامي جمهوري دولت مکلف دی، چې د افغانانو د ځان، مال او حیثیت دفاع وکړي او ټول ملي او نړیوال جرایم چې په دې خاوره کې پېښېږي، په جدي توګه وارزوي.
د ا.ا.ج دولت لویه څارنوالي امنیتي-کشفي بنسټونو ته هدایت ورکړی، چې له نړیوالو جرمونو سره د مبارزې څارنوالۍ ریاست په همغږۍ دا پېښه د هېواد د نافذه قوانینو په رڼا کې په هراړخیزه توګه بررسي کړي او خپلې موندنې د تحقیق، عدلي تعقیب او د مرتکبینو د مجازاتو لپاره له دې ادارې سره شریکې کړي.
لویه څارنوالي د قانون د مجري بنسټ په توګه، د هرې قضيې په دقیقې، جدي او هراړخیزې ارزونې سره زړورو او رنځېدلو هېوادوالو ته ډاډ ورکوي، چې له قانونه د بښنې وخت پای ته رسېدلی او دغې ادارې ته هېڅ فرد او ډله له قانون څخه لوړه نه ده.
