د لويې څارنوالۍ عالي شورا غونډه وشوه
د لويې څارنوالۍ عالي شورا غونډه د لویې څارنوالۍ د سرپرست محترم ذبیحالله کلیم په مشرۍ د ۱۴۰۰ لمریز کال د زمري پر شلمه وشوه.
په پيل کې د لویې څارنوالۍ سرپرست محترم ذبیحالله کلیم د اته ګونو کمېټو او په درېیو وروستیو میاشتو کې په دې اداره کې د اجرااتو د چټکتیا ستاینه وکړه او زیاته يې کړه، چې په دې اداره کې چارې مخ په ښه کېدو دي.
ښاغلي کلیم په دې اداره کې نویو رئیسانو ته د مسؤولیتونو مبارکي ورکړه او زیاته يې کړه، چې د تغییر او تبدیل موخه د چارو ښه والی او د ښو عدلي خدماتو وړاندې کول دي. خلک هیله من دي، چې د دغې ادارې په چارو کې مثبت تغییر راشي. د لویې څارنوالۍ سرپرست زیاته کړه، چې په ټولو کچو کې باید صلاحیتونه مسؤولانه اعمال او له دې سره به د خلکو ستونزې پر وخت حل شي.
د غونډې په لومړۍ برخه کې، د لوګر استیناف څارنوالۍ د یوه اداري کارکوونکي په تړاو چې په خدمتي توګه په بغلان استیناف څارنوالۍ کې دنده ترسره کوي، بحث وشوه.
د عالي شورا غړو په دې هکله تر بحث وروسته تفتیش څارنوالۍ ریاست ته دنده وسپارله، چې د نوموړي کاري سوابقو ته په کتو، موضوع په دقیقه توګه بررسي او د عالي شورا راروانې غونډې ته راپور وړاندې کړي.
د غونډې په دویمه برخه کې د بشري سرچینو د پراختیا عمومي ریاست استهداییه چې د لویې څارنوالۍ د ځینو منسوبینو د تقاعد حقوقو د نه اجرا په هکله وه، بحث وشو. دا متقاعدین د ناروغۍ له کبله متقاعد شوي دي.
د عالي شورا غړو د تدقیق او مطالعاتو څارنوالۍ استهداییې تر اورېدو وروسته، یوه کمېټه وګمارله، چې دا موضوع له عدليې وزارت سره شریکه او د دغه وزارت تر قانوني مشورې وروسته د څارنوالۍ د منسوبینو د تقاعد حقوقو د اجرا په هکله د تقاعدو د خزینې له عمومي ریاست سره تفاهم وشي.
د غونډې په درېيمه برخه کې، د کنټرول او مراقبت څارنوالۍ عمومي ریاست د دندې او واکونو مسوده د عالي شورا غړو ته وړاندې شوه.
عالي شورا په دې هکله تر بحث وروسته پرېکړه وکړه، چې د لویې څارنوالۍ د تشکیل او واکونو نوی قانون چې د کنټرول او مراقبت څارنوالۍ عمومي ریاست صلاحیتونه هم پکې راغلي، د نورو پړاونو د بشپړولو په موخه عدلیې وزارت ته لېږل شوی دی؛ نو د دغه قانون تر انفاذ او د لویې څارنوالۍ د مشرتابه لیدلوري ته پام به پر دې مقررې به بحث وشي.
د غونډې په څلورمه برخه کې، د مسکوني ودانیو د تلاشي او تفتیش په عملیاتو کې د څارنوالانو د اجرااتو طرزالعمل چې د وظیفوي تداخل د مخنیوي په موخه جوړ شوی دی، د عالي شورا غړو ته ارایه شو.
د عالي شورا غړو پرېکړه وکړه، چې دا طرزالعمل د لویې څارنوالۍ د عسکري چارو مرستیال د کورنیو چارو وزارت او ملي امنیت ریاست سره په همغږۍ شریک او د یوه تفاهم له مخې دې نهايي او طی مراحل شي.
د غونډې په پنځمه برخه کې، د معلولیت لرونکو وګړو د حقوقو د ملاتړ طرزالعمل پر مسودې بحث وشو.
عالي شورا په دې هکله تر بحث وروسته یاد طرزالعمل په پرنسیب کې تایید کړ او د سرچینو او ادارې عمومي ریاست ته يې دنده وسپارله، چې د عالي شورا د غړو تر نظریاتو او د کمیټو تر تصحیح وروسته دې تکثیر شي.
د غونډې په وروستۍ برخه کې د لویې څارنوالۍ غړو د ولایتونو ناوړه امنیتي وضعیت ته په کتو، د لویې څارنوالۍ د کارکوونکو ستونزو ته د رسېدنې په موخه کمېټې ایجادې او لازمې پرېکړې وکړې.
