له ایران څخه د افغان بندیانو د لېږد دوام؛۱۹۹ افغان بندیان د افغانستان اسلامي امارت ته وسپارل شول
له بهر څخه د افغان بندیانو د انتقال کمېټې په کوښښ چې مشري یې د فرمانونو او حکمونو د تعقیب او نظارت لوی رییس مولوي شمس الدین شریعتي کوي د نورو اړوندو ادارو له استازو سره په ګډه چې د دغې کمېټې غړي دي، ۱۹۹ افغان بندیان چې په ایران کې په بېلابېلو تورونو په بند محکوم شوي وو د نیمروز بندر له لارې د ا.ا.ا مسوولینو ته وسپارل شول.
دا بندیان په ایران کې په یو کمپ کې ساتل کېدل چې د ا.ا.ا مسوولینو له افغانستان څخه د وروړل شویو وسایطو په وسیله هېواد ته را ولېږدول.
یاد محکومین به له روغتیایي ارزونو وروسته خپلو اړوندو ولایتونو ته ولېږدول شي.
همدارنګه دوه ایراني بندیان هم د ښه نیت په موخه په بهر کې د افغان بندیانو د انتقال کمېټې له خوا چې سرپرستي يې د زندانونو چارو د تنظیم ادارې لوی رییس مولوي محمد یوسف مستري کوله، په نوموړي بندر کې ایراني مسوولینو ته وسپارل شول.
دا بهیر به د دواړو هېوادونو د ښو او بالمثل اړیکو لپاره په روان کال کې هم دوام ومومي.
نوموړي بندیانو په دې برخه کې د افغانستان اسلامي امارت له مسوولینو څخه مننه کړې ده.
د یادونې ده چې مخکې له دې هم ۲۱۱ افغان بندیان چې په ایران کې په بند محکوم شوي وو په بهر کې د افغان بندیانو د انتقال کمېټې له خوا هېواد ته را لېږدول شوي وو.
