د اداري فساد زیانونه د تروریستي پېښو له زیانونو کم نه دي
د افغانستان په امنیتي او دفاعي سکتور کې له اداري فساد سره د ګډې مبارزې درې ورځني کنفرانس د دویمې ورځې غونډه په کانتینتال هوټل کې ترسره شوه. په یاد کنفرانس کې د لوی څارنوال د عسکري چارو مرستیال ډګر جنرال عبدالفتاح عزیزي وویل، چې د اداري فساد زیانونه د تروریستي پېښو له زیانونو کم نه دي.
.JPG)
نوموړي زیاته کړه، چې د دغه کنفرانس یوه موخه په امنیتي او دفاعي بنسټونو کې د اداري فساد له منځه وړل دي.
ښاغلي عزيزي په امنیتي او دفاعي بنسټونو کې اداري فساد ناوړه پدیده وبلله او زیاته يې کړه، چې په جګړه ييزو عملیاتو کې فساد د جګړې په ډګر کې د امنیتي او دفاعي ځواکونو په روحیه منفي اغېز کوي.
د دغه کنفرانس په دویمه ورځ کې ګډونوال په پنځه ډلو ووېشل شول، چې په امنیتي او دفاعي سکتور کې د اداري فساد لاملونه په ګوته کړي او مناسبې حل لارې وړاندې کړي.
ټاکل شوې ده، چې سبا د یاد کنفرانس په درېیمه ورځ کې د تشکیلاتي، کادري، تدارکاتي، مالي او د بېلابېلو لوژیستیکي عینیاتو د اکمال او توزېع د کړنلارې د سمون په موخه بحث ترسره شي.
