د اداري فساد له لویو جرمونو سره د مبارزې عدلي قضايي مرکز دوه کسان علني محاکمه کړل
د اداري فساد له لویو جرمونو سره د مبارزې عدلي او قضايي مرکز د کندهار د معروف ولسوالۍ مالي معتمد دویم څارن عبدالجلیل او تخنیکي معتمد ذبیح الله د روان کال د تلې پر ۱۸ په علني ډول محاکمه کړل.
عبدالجلیل د کندهار د معروف ولسوالۍ د منسوبانو په معاش او بدل اعاشه کې د ۱۳ میلیونو، 955 زره او 792 افغانیو اختلاس په جرم د جزا قانون د 158 مادې له مخې په شل کاله بند محکوم شو.
همداراز نوموړې محکمې عبدالجلیل د جزا قانون د ۲۷۳ مادې له مخې اړ وباله چې اختلاس کړې پیسې به بیرته دولت ته سپاري.
د دې محکمې قضايي پلاوي وویل، چې ۱۳ میلیونه، ۹۹۹ زره او ۲۰۰ افغانۍ دولت ته سپارل شوې دي او دا پيسې دې د پيسو د بیا سپارنې په توګه اجرا وړ وګرځي.
په ورته مهال کې ذبیح الله د کره دلایلو د نشتوالي له امله د محکمې له لوري برائت ترلاسه کړ.
د یادونې وړ ده، چې د اداري فساد له لویو جرمونو سره عدلي او قضايي محکمې د دې پيښې په تړاو د کندهار د معروف ولسوالۍ امنیه قومندان نادرخان او د دغې قومندانۍ کارکوونکی عبدالمتین د تعقیب وړ وبلل.
