د هرات ولایت د ۶۰۶ انصار زون قوماندانۍ درې تنه کارکوونکي محاکمه شول
دغه درې تورن کسان له دندې څخه د ناوړه ګټې اخیستنې په تور د اداري فساد له لویو جرمونو سره د مبارزې عدلي او قضایي مرکز د ابتدایي محکمې له خوا د ۱۳۹۶ کال د حوت پر ۲۳ په ښکاره ډول محاکمه شول.
په دغه قضایي ناسته کې د انصار ۶۰۶ زون د جنایي څېړنو رئیس پاسوال سید عمر نائب زاده، د انصار ۶۰۶ زون مرستیال او د تحلیل او ارزونې مدیر سمونیار نجیب الرحمن او د انصار ۶۰۶ زون د جنایي څېړنو ریاست غړی څارن عبدالرحمن محاکمه شول.
د دغې قضایي ناستې پلاوي، سید عمر نائب زاده د عسکري جرمونو قانون د ۴۲ مادې لومړۍ فقرې او د جزایي اجرااتو قانون د ۲۰۹ مادې پر اساس په غیابي ډول په درې کاله تنفیذي بند محکوم کړ.
په دغه قضایي ناسته کې عبدالرحمن د عسکري جرمونو قانون د ۴۲ مادې لومړۍ فقرې، د جزایي اجرااتو قانون د ۲۰۹ مادې او د یاد قانون د څلورمې مادې په رعایتولو سره په درې کاله تنفیذي بند محکوم شو.
د یادې شوې ناستې قضايي پلاوي، سمونیار نجیب الرحمن ته چې د تور په اړه یې کره شواهد نه و تر لاسه شوي، د جزایي اجرااتو قانون د پنځمې او جزا کود د پنځمې مادې پر اساس برائت ورکړ.
د یادې قضايي ناستې رئيس وویل، چې دغه پرېکړه وروستۍ نه ده او محاکمه شوي کسان د قناعت نه کولو په صورت کې د استیناف محکمې غوښتنه کولای شي.
