د اداري اصلاحاتو او ملکي خدمتونو کمېسیون یو قراردادي کارکوونکی له څلورو نورو کسانو سره د فرېبکارۍ او د ۲۰ زرو امریکايي ډالرو رشوت په تور ونیول شو
دا پنځه کسان چې د اداري اصلاحاتو او ملکي خدمتونو خپلواک کمېسیون یو کارکوونکی هم پکې راځي، د لویې څارنوالۍ د کنټرول او مراقبت څارنوالۍ عمومي ریاست له خوا د یاد شوي کمېسیون په همکارۍ د دوکې او د ۲۰ زرو امریکايي ډالرو رشوت غوښتلو په تور نیول شوي دي.
له یاد شوي کس څخه یوه هېوادوال شکایت کړی و، چې بیا د اداري اصلاحاتو او ملکي خدمتونو د خپلواک کمېسیون له خوا د کنټرول او مراقبت څارنوالۍ عمومي ریاست ته دا شکایت رارسېدلی و، چې دغه ریاست له یاد کمېسیون او کشفي بنسټونو سره په همغږۍ د دوی د نیول پلان ترتیب او تر مستند کولو وروسته مظنون کسان یو په بل پسې ونیول شول. د دغو مظنونانو وروستی کس چې د یاد کمېسیون قراردادي کارمن و، سه شبنه د کب پر ۱۹ ونیول شو.
د دغو پنځو کسانو دوسیه تر څېړنې لاندې ده او پایله به یې د تحقیقاتي پړاوونو تر بشپړولو وروسته له هېوادوالو سره شریکه شي.
له اداري فساد د مبارزې او د قانون د حاکمیت په برخه کې د هېوادوالو او د ادارو د مسؤولینو همکاري ګټور رول لري.
د افغانستان اسلامي جمهوري دولت لویه څارنوالي، له اداري فساد سره د مبارزې په برخه کې ژمنتیا لري، دا اداره ټولې قضيې په پرې او خپلواکه توګه د اسنادو او شواهدو او همداراز د هېواد د نافذه قوانینو په رڼا کې څېړي.
