د لویې څارنوالۍ د خدمات رئيس معرفي شو
ناظم مظهر د ازادې سیالۍ (تغییر پروژې) له لارې او د لويې څارنوالۍ په منظورۍ او د جمهوري ریاست په حکم په دویم بست کې د لویې څارنوالۍ د خدماتو د رئيس په توګه وګومارل شو.
د نوموړي د معرفۍ غونډه چې د ۱۴۰۰ لمریز کال د غويي پر ۲۷ ترسره شوه، د منابع او ادارې عمومي رئيس وحیدالدین ارغون، د بشري سرچینو د پراختیا عمومي رئيس محمد نواب احمدزي، مالي او اداري عمومي رئیس او ځینو نورو رئیسانو ګډون کړی و.
د منابع او ادارې رئیس وحیدالدین ارغون د خدماتو رئيس ته د نوې دندې مبارکي ورکړه او د پخواني رئيس د اجرااتو ستاینه يې وکړه. د نوموړي په وینا، د خدماتو ریاست د لویې څارنوالۍ یو مهم ریاست دی او په دې وروستیو کې يې د ادارې د زیربناوو په جوړښت کې زیات کارونه کړي چې حفظ او مراقبت ته جدي اړتیا لري.
نوموړي د خدماتو تازه ګومارل شوي رئیس ته په اشارې وویل، چې د ادارې د قوت او کمزورۍ ټکي مشخص او د ننګونو د ختمولو لپاره لازم ګامونه واخلي. د ادارې د پلانونو تعقیب، د پروژو طرح او تطبیق، د تعمیراتو ساتنه، د اسنادو د ارشیف او تحویل خونو تنظیم او د ادارې اړتیاوو ته رسیدګي ځینې نور هغه موراد وو، چې ښاغلي ارغون د خدماتو له نوي رئيس څخه يې په تړاو د لازمو اقداماتو او اجرااتو غوښتنه وکړه.
په ورته وخت کې د لويې څارنوالۍ د خدماتو پخواني رئيس محمد آصف فیاض د لويې څارنوالۍ د رهبرۍ مننه وکړه، چې تل یې د نوموړي ملاتړ کړی او همداراز نوي رئيس ته يې د دندې مبارکي ورکړه.
بلخوا د لويې څارنوالۍ د خدماتو رئيس ناظم مظهر د دغې ادارې د رهبرۍ مننه وکړه او ژمنه يې وکړه، چې په ټول ځواک او ظرفیت به هېواد ته خدمت کوي.
