د عالي ادارو ترمنځ د اطلاع رسونې په برخه کې لويې څارنوالۍ ډېر شاخصونه تطبیق کړي
اطلاعاتو ته د لاسرسي کمېسیون د تحلیلي راپور پر اساس، لويې څارنوالۍ د ۶۴ ادارو ترمنځ د زیاتو شاخصونو د رعایتولو له اړخه د عالي ادارو په سر کې راغلې ده. دغه راپور، دولتي بنسټونه، ملت ته د دولت د حساب ورکولو په کلني راپور کې د اطلاع رسونې د شاخصونو د رعایتولو له مخې په درې کټګوریو؛ عالي، منځنیو او کمزورو وېشلې دي.
اطلاعاتو ته د لاسرسي کمېسیون د راپور پر بنسټ، هغو ادارو چې د اطلاع رسونې تر ۷۰ سلنه زیات شاخصونه پلي کړي، د عالي ادارو له ډلې شمېرل شوې دي. دا راپور زیاتوي، هغو ادارو چې له ۵۰ تر ۶۹ سلنه شاخصونه د حساب ورکولو په برخه کې مراعات کړي، منځنیو او تر ۵۰ سلنه ښکته بیا د کمزور ادارو له ډلې بلل شوې دي.
په ۱۳۹۹ مالي کال کې د ۶۴ ادارو له ډلې چې ملت ته د حساب ورکولو غونډې جوړې کړې، ۱۱ ادارې په عالي ادارو، ۴۵ په منځنیو او ۹ ادارې هم د کمزورو ادارو په ډله کې راغلې دي.
د افغانستان اسلامي جمهوري دولت لویه څارنوالي دا بریا ښه پرمختګ بولي او ژمنه کوي، چې د چارو د ښه ترسراوي په ځانګړې توګه د اطلاع رسونې په برخه کې خپلې هڅې پراخې کړي او د لا اغېزمنتیا لپاره یې ځینې پلانونه هم لري.
