شمالي ولایتونو ته د فرمانونو او حکمونو د تعقیب او نظارت لوی رییس سفر؛ د کندوز له مسوولانو سره ناسته وشوه
د فرمانونو او حکمونو د تعقیب او نظارت لوی رییس محترم مولوي شمس الدین شریعتي د یو لوړپوړي پلاوي په مشرۍ شمالي ولایتونو ته د سفر په ترڅ کې کندوز کې له ولایتي چارواکو سره تعارفي غونډه وکړه.
دې ناسته کې د کندوز محترم والي ملا نثار احمد نصرت، مرستیال والي، د علماوو شورا غړو او ځینو نورو نظامي او ملکي مسوولانو ګډون کړی و.
د پېژندګلوۍ دا ناسته سه شنبه د شوال المکرم پر ۱۹ د کندوز ولایت په مقام کې جوړه شوې وه.
د دې ناستې موخه، له ولایتي ادارو سره د دغه ریاست د همغږۍ پياوړي کول، د فرمانونو او حکمونو د تعقیب او نظارت لوی ریاست قانون څخه د ملکي او نظامي ادارو مسوولانو خبراوی، خلکو ته د غوره خدماتو وړاندې کول او په چارو کې د روڼتیا بنسټيز کول ښودل شوي دي.
د فرمانونو او حکمونو د تعقیب او نظارت لوی رییس له مل پلاوي سره د کندوز له ولایتي مسوولینو سره په غونډه کې د امیرالمومنین حفظه الله د فرمانونو او حکمونو پر تعقیب او نظارت ټينګار وکړ.
په دې ناستو کې پرېکړه وشوه، چې د لا ښې همغږۍ، د اړیکو پیاوړي کولو او د محلي مسوولانو د حقوقي پوهې د لوړاوي په موخه دې نورې ناستې هم جوړې شي.
ورته مهال د کندوز ولایتي مسوولینو په دې ناسته کې د فرمانونو او حکمونو د تعقیب او نظارت لوی رییس او مل پلاوي مننه وکړه او د دا ډول غونډو جوړېدل یې ښه ګام وباله.
هغوی ژمنه وکړه، چې د ا.ا.ا د مشرتابه د فرمانونو او احکامو د تطبیق په موخه به له دغه ریاست سره هراړخیزه همکاري کوي.
د یادونې وړ ده، چې د فرمانونو او حکمونو د تعقیب او نظارت لوی رییس شمال ختیځو ولایتونو ته د سفر لړۍ پیل کړې او له دې وړاندې یې د تخار او بدخشان له ولایتي چارواکو سره بېلابېلې غونډې کړې دي.
