د افغانستان د شمال زون څارنوالیو د کړنو د څېړنې پلاوی سمنګان ته ورسید
دغه پلاوی چې د تفتیش، کنترول او مراقبت، مالي او اداري او له ازادۍ پر محرومو ځایونو د نظارت او د احکامو د تنفیذ ریاستونو څخه تشکیل شوی، د تحقیق په چارو کې د لوی څارنوال د مرستیال ډاکتر غلام حیدر علامه په مشرۍ یې د هېواد شمال زون ته سفر کړی دی.
دغه پلاوي د ۱۳۹۸ کال د وري پر ۲۰ د یاد شوی ولایت له مقام، کشفي او امنیتي مسولانو، محکمو، د ولایتي شورا له غړو، مدني ټولنو، عالمانو او قومي مشرانو سره لیدنه وکړه.
په قضایي تعقیب چارو کې د لوی څارنوال مرستیال له یادو بنسټونو، ټولنو، عالمانو او قومي مشرانو سره په دغې لیدنه کې د دغه سفر موخه د سمنګان ولایت د څارنوالیو د مسلکي اجرااتو څېړنه او د اداري څانګو څخه یې نظارت او له نورو ادارو سره د یاد بنسټ همغږي په ځانګړې توګه له مراجعینو او خلکو سره د دوی چلند یاد کړ.
ډاکتر غلام حیدر علامه په خپلو خبرو کې څرګنده کړه، چې د افغانستان د اسلامي جمهوري دولت لویه څارنوالي غواړي، د هېواد په هره برخه کې قانون یو شان تطبیق او عدالت تأمین کړي. نوموړي زیاته کړه: «لویه څارنوالي هڅه کوي، هېوادوالو په ځانګړې توګه هغه چا ته چې د هېواد په لرې پرتو سېمو کې ژوند کوي عدالت ته د لاسرسي زمینه برابره کړي.» د لوی څارنوال مرستیال د خپلو خبرو په دوام سره وویل، د لویې څارنوالۍ رهبرۍ تل هڅه کړې، چې قانون په بې پرې توګه په ټولو هېوادوالو تطبیق او عدالت تأمین کړي»
د سمنګان سرپرست والي، د لویې څارنوالي دا هڅه وستایله او دا یې یو ارزښتمند عمل وباله. نوموړي همداراز د سمنګان ولایت د استیناف څارنوالۍ اجراات او د ولایت له مقام سره د یاد بنسټ د همغږۍ ستاینه وکړه او له دغې ادارې سره یې د همکارۍ ډاډ هم ورکړ.
په ورته مهال کې سمنګان ته لیږل شوي پلاوي، د یاد شوي ولایت د استیناف محکمې له رئیس سره هم ولیدل. د استیناف محکمې رئیس د لویې څارنوالۍ له دې نیک اقدم څخه مننه وکړه او زیاته یې کړه، چې د یاد ولایت څارنوالي او محکمه یو له بل سره همکار او په خپلو اجرااتو کې سره همغږي دي.
همداراز د ډاکتر غلام حیدر علامه په مشرۍ پلاوي، د دغې ولایت د بندخونې له مدیریت څخه لیدنه وکړه او په دغې بندخونه کې یې ستونزې او ننګونې له نږدې واورېدې او د حل په موخه یې اړونده مسؤولانو ته لازم هدایت ورکړ.
د دغه پلاوي رئیس ډاکتر غلام حیدر علامه، د دغه ولایت د امنیې له قوماندان او د امنیت له رئیس سره هم ولیدل او د عدالت د تأمینولو لپاره یې د ادارو تر منځ همکاري او همغږي اړین وګڼل. د یاد شوي ولایت امنیه قوماندان او د امنیت رئیس د کشفي او امنیتي ادارو تر منځ د شته اړیکو ستاینه وکړه او په دې برخه کې یې د لاهمکارۍ ژمنه وکړه.
ښاغلي علامه د سمنګان د استیناف څارنوالۍ له کارکوونکو سره په لیدنه کې زیاته کړه، چې د هېواد په لرې پرتو سیمو کې د څارنوالانو حضور عدالت ته د لاسرسي په برخه کې د هېوادوالو هیلې ژوندی کوي. د نوموړي په باور، د عدالت تحقق د هېواد په لرو پرتو سیمو کې پر حکومت او ځانګړې توګه په عدلي او قضایي بنسټونو د خلکو د ملاتړ سبب کیږي.
د یادونې وړ ده، چې له مرکز څخه لېږل شوي پلاوي د علماوو او ولایتي شورا سره هم له نیږدې ناسته کړې. دوی هم د قانون د تطبیق او د عدالت د تأمین په برخه کې د یاد ولایت د څارنوالۍ له کړنو خوښي څرګنده کړې او له عدلي او قضایي ادارو سره یې د لاهمکاریو ژمنه کړې ده.
