د زندانونو او د توقیف خونو ریاست ۷ کارکوونکي په مجازاتو محکوم شول
د زندانونو او د توقیف خونو ریاست ۷ کارکوونکي په مجازاتو محکوم شول
د لوژستیک مدیر مل پاسوال سعادت میر، د کتنې پلاوی هر یو سمونوال سید احمدالله، سمونمل عبدالحمید، څارمن پرویز، سمونمل همایون، سمونمل محمد آصف او سمونیار محمد نعیم له وظیفوي واک څخه د ناوړې استفادې په تور د اداري فساد له لویو جرمونو سره د مبارزې عدلي او قضايي مرکز اسیتناف محکمې له خوا د ۱۳۹۹ لمریز کال د مرغومي پر ۲۲ په علني توګه محاکمه شول.
د یادو شویو تورنو نسبتي دوسیه د برېښنا د ۶۳ جرمني امپير ۱۳۰۰ اتوماتو فیوزونو د پېرلو په تړاو چې د محابسو او توقیف خونو د اړتیا له مخې اخیستل شوي او د شرطنامې پر خلاف د مرکز په شمول ۳۴ ولایتونو ته توزیع شوي وو، د عدالت د تأمین په موخه تر عدلي تعقیب لاندې راغلې ده.
د دې قضيې په تړاو د څارنوال تر تحقیق وروسته مشخص کېږي، چې تورن له شرکت سره په ګډه د شرطنامې خلاف بې مارکه فیوزونه تسلیم او ۳۴ ولایتونو ته يې ته توزیع او استولو راپور چمتو کړی؛ خو له تحقیقاتو وروسته په ډاګه کېږي، چې دا اجناس د مرکز د محابس او توقیف خونو په شمول ۱۲ ولایتونو ته استول شوي دي.
د قضيې موظف څارنوال د صورت دعوا تر ترتیب او د اسنادو او مدارکو تر بشپړولو وروسته تورنو ته د جزا کوډ د ۴۳۹، ۳۹۱، ۴۰۷، او ۱۷ مادې پر اساس د مجازاتو غوښتنه وکړه.
د اداري فساد له لویو جرمونو سره د مبارزې عدلي او قضايي مرکز اسیتناف محکمې په علني محکمه کې د تورنو د مدافع وکیل د دفاعیې تر اورېدلو وروسته د زندانونو او توقیف خونو د عمومي ریاست د لوژستیک مدیر مل پاسوال سعادت میر له وظیفوي واک څخه د ناوړه استفادې په تور په اوو کالو او اوو میاشتو تنفیذي حبس او په اتو زرو او ۳۸۵ افغانیو نقدي جزا محکوم کړ.
دغې قضايي ناستې سمونوال سید احمدالله په وظیفوي واک کې د ناوړه استفادې د شراکت په تور په دوو کالو او دوو میاشتو، سمونمل عبدالحمید په یو کال او څلورو میاشتو او څارمن پرویز په یو کال او درېيو میاشتو، سمونمل همایون په یو کال او دوو میاشتو، سمونمل محمد آصف په یو کال او یوه میاشت او سمونیا محمدنعیم په یو کال پنځو میاشتو تنفیذي حبس په مجازاتو محکوم کړل.
د یادونې وړ ده، چې له لویو جرمونو سره د مبارزې عدلي او قضايي مرکز ابتدایه محکمې د ۱۳۹۹ لمریز کال د لیندۍ پر ۱۶ دا کسان په همدې موده حبس او نقدي جزا محکوم کړي وو.
