د لويې څارنوالۍ د پنځه کلنې ستراتیژۍ د تطبیق لپاره د عملیاتي پلانونو روزنیز پروګرام جوړ شو
لويه څارنوالۍ کې د دغې ادارې د پنځه کلنې ستراتيژۍ د تطبیق په موخه د عملیاتي پلانونو روزنیز پروګرام د ۱۳۹۷ کال د زمري پر ۱۶ جوړ شو. دا پروګرام د مسلکي زده کړو انستیتیوت ریاست په تالار کې ترسره شو او د دغې ادارې مرستیال او ځینو رئيسانو پکې ګډون کړی و.
د دغه پروګرام د ترسراینې موخه د پنځه کلنې ستراتیژۍ ښه پلي کول او هغو موخو ته رسېدنه چې په ستراتيژيک پلان کې راغلي، بلل شوې ده.
د دغه پروګرام په پرانیسته کې د تحقیق په چارو کې د لوی څارانول مرستیال څارنپوه نورحبیب جلال وویل، چې د لويې څارنوالۍ د پنځه کلنې ستراتيژۍ په تدوین کې د دغې ادارې د کارکوونکو له نظریاتو استفاده شوې او یاده شوې ستراتیژي یوه هراړخیز ستراتیژي ده.
ښاغلي جلال وویل: «دا عملیاتي پلانونه له موږ سره مرسته کوي، چې پنځه کلنه ستراتيژي په ښه ډول پلې کړو.» د تحقیق په چارو کې د لوی څارنوال مرستیال پلان د کارونو د ښه تنظیم لپاره ګټور وباله او زیاته يې کړه، چې پرمختللې ټولنې د دقیقو پلانونو په مرسته پرمختګ کړی دی.
ټاکل شوې ده، چې د لویې څارنوالۍ پنځه کلنه ستراتيژۍ به په نژدې راتلونکي کې نهايي او د تطبیق په موخه به یې عملي چارې پيل شي.
